طلاب الثانوية العامة 2024 امتحاناكم غدا كلام مهم جدا قبل ما تناموا
عزيزي طالب الثانوية العامة 2024، الامتحانات هتبدأ بكرة إن شاء الله.. بفكرك.. لو رحت اللجنة بدري قبل الساعة 9 الصبح.. اتفتشت بدري.. هتدخل بدري اللجنة.. هتستلم ورقة الإجابة بدري.. هتكتب بياناتك وتسجلها وتظلل رقم الجلوس بدري.. ومش هيضيع منك دقيقة واحدة وهتاخد وقتك كامل.. هتروح متأخر.. برضو هتتفتش.. هتدخل متأخر.. تستلم ورقتك متأخر.. تسجل بياناتك متأخر.. هتضيع وقتك.
متحاولش تغش ولا تعمل أي حاجة غلط
قال أحمد حافظ محرر شئون التعليم بالأهرام عبر صفحته الشخصية على موقع التواصل الأجتماعى فيس بوك، طالب الثانوية العامة 2024 انت في المواد غير المضافة للمجموع مش مطلوب منك غير إنك تنجح وبس في كل مادة.. متحاولش تغش ولا تعمل أي حاجة غلط.. علشان لو عملت حاجة أو كان معاك تليفون هتسقط في كل المواد بلا استثناء.
عزيزي طالب الثانوية العامة 2024، المواد غير المضافة للمجموع مفيهاش كتيبات مفاهيم.. ومفيهاش أي أسئلة مقالية.. وكل الأسئلة اختيار من متعدد.. وكل سؤال عليه درجة.. ما عدا مادة الإحصاء فيه أسئلة عليها درجة وأسئلة عليها درجتين.
عزيزي طالب الثانوية العامة 2024 ، في بوكليت أسئلة الإحصاء هتلاقي القوانين والنظريات اللي انت محتاجها في الامتحان.. مش لازم تحفظها.. انت هتلاقيها في نهاية البوكليت.
عزيزي طالب الثانوية العامة 2024، متجاوبش في بوكليت الأسئلة علشان الوزارة مش هتصحح البوكليت.. جاوب أول بأول في ورقة البابل شيت.
القلم الجاف فقط
عزيزي طالب الثانوية العامة 2024، ماتجاوبش بالقلم الرصاص.. القلم الجاف فقط.. سواء في كتابة بياناتك أو وانت بتظلل رقم الجلوس أو تظليل الإجابات في البابل شيت.. بلاش القلم الرصاص خالص.
عزيزي طالب الثانوية العامة 2024، لو ظللت دايرة قصاد أي سؤال واكتشفت إنها غلط وعايز تلغيها.. إعمل عليها علامة إكس.. وروح ظلل الدايرة التانية عادي.. متقولش هيحسبولك السؤال غلط.. ده مش هيحصل.. هتاخد حقك.. والسؤال ده تحديدا هيتراجع التصحيح بتاعه 3 مرات.. المهم توضح علامة الإكس علشان متبقاش مختار إجابتين.
عزيزي طالب الثانوية العامة 2024، متنساش.. روح بدري.. ادخل بدري.. تستلم بدري.. تحل بدري.. تخلص بدري.
