ايها المعلم أزاي تعيش بمرتب 1200 جنيه في الشهر ..جرب هذا الطريقة وبلاش لحمة ورفاهية وزواج

كيف يعيش المعلم والاداري وجموع العاملين بوزارة التربية والتعليم كيف يعيشون بـ 1200 جنيه في الشهر ، رسالة ساخرة ارسالها معلم الي الحكومة المصرية ، حملت في طياتها المعاناه التي يعيشها العاملين بحقل التعليم

قال احمد ازهري " معلم " في رسالته عبر صفحته الشخصية علي موقع التواصل الاجتماعي " الفيس بوك " هل 1200 جنيه تفتح بيت وتاكل وتتزوج وتنجب اطفال ؟؟؟ دون اي مشاكل ومعوقات ؟؟؟

اضاف ، انا عملت الجدول البسيط دا عشان تشوفوا ازاي ممكن تعيش بـ 1200 جنيه مع الاستغناء عن الكثير من المتطلبات ومع الكثير من السخريه المرة حول هذا الوضع المرزي

الناتج في النهايه 1238 جنيه في الشهر مع العلم اننا لا حسبنا شقه ايجار بـ كذا ولا مصاريف عيال ولا مدارس ولا دروس

طبعا دي حياة مرفهه وجميله ومافيش بعد كدا ترفيه ويادوووبك نقدر نقول اننا في مصاف الدول المتقدمه ونعيش احلى حياة في العالم

المفروض اننا نروح نبوس ايدينا وش وظهر بصراحة لان الحد الادنى هيطبق ومش مشكله ابقى استلف الـ 38 جنيه الزياده

طبعا مفيش سجاير ولو هتحسب السجاير يبقى حط على الاقل 250 جنيه

ماتنسوش طبعا كمان مفيش دكتور

ومفيش اعياد ميلاد ولا اعياد جواز ولا اعياد ام

ولا اي حاجه

وكفايه اوي عليك 50 جنيه في السنه عشان تشتري لحمه العيد

وربع كيلو كحك عيد الفطر …

وطبعا مفيش هدوم ومفيش جزمه

ومفيش خروج ومفيش كنتاكي ومفيش هارديز

ومفيش نوادي ولارياضه ومفيش مدارس

ومفيش عيال ومفيش دروس خصوصيه

ومفيش باص مدرسه ومفيش يونيفورم

ومفيش كشاكيل ومفيش اقلام ولاكتب

مفيش حلويات ومفيش تسالي ومفيش كباب وكفته

ومفيش نروح نشرب عصير قصب في اليوم بجنيه

والفواكه ماتحلمش بأكتر من موز بلدي وشويه برتقال ,,

مفيش تفاح ولا مانجه ولا توت ولا فراوله ولااااا الحاجات دي

مفيش عسل ولا مربى ولاسجق ولا بسطرمه

مفيش تورته ولا جاتوه ولا صوابع زينب ولا صوابع سيد حتى

مفيش موبايلات تتغير الا كل 10 سنين طبعا ربنا يخلي 3310 لسا عايش

ولو انت بتلبس نظارة ماتكسرهاش وخليك عايش بيها 5 سنين

ولو انت ضرسك واجعك قلتلك مفيش دكتور استحمل لحد ماتشيله بزراديه او كماشه

مفيش سينما ولا قعده على البحر ولا رحله لشرم ولا برم

مفيش زيارات عائليه عشان الميزانيه اساسا مش مستحمله

انت بس تروح تعزي ,, لكن تعزم حد او تتعزم لالالالالالا

ولاهنروح ماتش كورة ولا هنروح نشرب حاجه ساقعه عند الكشك

لاننا قلنا كفايه 2 لتر وتشتريها مرتين في الشهر ومش ناقصه مصاريف

ولاهنروح دكتور ولا نشتري دوا ولا نعمل اشعه ,,

ولسا فيه ناس بتقلك يارب يطبقوا الحد الادنى 1200 جنيه واحنا في سنه 2015
والحاجه كل يوم في غلاء وزياده بطريقه جنونيه

الحد الادنى المطلوب على الاقل في ظل هذا الغلاء وهذه الحياة غير الكريمه على الاقل 2500 جنيه