عاجل وخاص بالمتقدمين لـ "كلية الشرطة" والكليات العسكرية.. ازاي تنجح في الكشف الطبي
الأربعاء 02/أغسطس/2017 - 05:31 م
يقدم موقع السبورة نصائح خاصة لجميع الطلاب الذين يريدون الالتحاق بكلية الشرطة أو جميع الكليات العسكرية خاصة فى الاختبارات الطبية التى يرون صعوبة بالغة فى اجتيازها.
تأتى نصائح السبورة فى 10 نقاط ننجزها فيما يلى:
1. نظافتك الشخصية في ايام الكشف.. كلنا فاهمين ومش هطول
2 . تقوم حالا تعمل تشيك اب على نفسك . كل حاجة زي انف واذن وحنجرة وباطنة وعظام ورمد وركز على الرمد خليه يكشف على قاع العين وعلى مستوى النظر ويطمنك واعمل رسم قلب واعمل تحليل زي صورة دم كاملى وسكر ووظائف كبد ووظائف كلي وتحليل بول.
2- معلش النقطه دي كبيرة بس هنتكلم فيها برضه ليه اكشف ده كله ؟ ده مكلف جدا ؟ هستفاد ايه ؟
اقولك احيانا بنكون عندنا امراض واحنا منعرفش كشفك في الملكي هيساعدك على اكتشاف المرض وعلاجه قبل ماتقدم وبالتالي مفيش حاجى هتسقطك.
3 . هيتطلب من حضرتك تغسل الاذن قبل الكشف ماتغسلش اذنك وخلاص خلي الدكتور يشوف ودنك محتاجه غسيل ولا لا عشان في بعض الاحيان غسيل الاذن بيسبب التهابات.
4 . وانتا بتكشف بلاش تجري او تستعجل في المشي هتلاقيك داخل عيادة القلب ودقات قلبك سريعه هتسقط فامشي براحتك وبلاش توتر طب لو حصل انك نسيت وجريت واتفاجئت اسأذن من الظابط الطبيب ايلي معاك وعرفه انك كنت بتجري برا هيكشف عليك تاني .
5 . في كشف الجلدية بلاش توتر عشان العرق وانتا داخل امسح ايدك في هدومك بتكون قاعد في الحر وعرقان او ماسح عرقك بايدك فالدكتور هيفتكر ان ايدك بتعرق.
6 . في الرمد متحاولش تحفظ العلامات اي اتجاه عشان بتتغير وانتا هتجاوب غلط وهتسقط ركز في العلامات وخد وقتك بس ماتستعجلش وتقول اي اجابه احنا مش في مسابقه .
7 . اشرب مياه كتير هتنفعك في كشف السونار وهوا بيكشف علي الكلي وفي التحاليل.
8 . بالله عليك ياخي وانتا رايح للتحاليل بلاش تلعب رياضه قبلها ب 4 ايام طب ليه ؟ لما حضرتك بتلعب لياقه وتحمل علي نفسك الكبد بيفرز انزيم alt بزياده فبالتالي بيبان ان عندك انزيمات الكبد عاليه وهتسقط بلاش رياضه عشان انزيماتك تكون في الطبيعي (هاااااام جدا).
9. بلاش تاكل او تشرب اي عصير يوم التحاليل عشان نسبة السكر حتي لو انتا جاي من الصعيد مش هتموت من الاكل بس لو السكر طلع عالي هتزعل.
10 . واخير بلاش سهر ونام بدري في اليوم ايلي قبل الكشف عشان لما تقوم تبقا فايق وعينك مش حمرا او تلتهب.
