11 سببا تجعل مهنة التدريس فى مصر اتعس مهنة ..ودول نقطه في بحر مما يعانى منه المعلم

قال مسيو نبيل معلم اول لغه فرنسيه بمدرسة احمد بهجت التجريبيه المتميزة للغات بالهرم ، عبر صفحته الشخصية على موقع التواصل الاجتماعى الفيس بوك ، في رأيي مهنه التدريس في مصر هى اتعس مهنه لاسباب عده منها :

١-المرتب ضعيف جداااا

٢-مطلوب من المدرس انه يلبس كويس جدااا ويكون قدوة للطلاب ،، مينفعش تشتغل شغلانه تانية بعد الظهر تقل منك ذى سواقه توك توك او الوقوف في سوبر ماركت لان الطالب مينفعش يشوفك فالوضع ده...طيب منين وازاى؟؟؟

٣-معرض لكل مشاكل الدنيا جوه المدرسة :طالب بقه يبجح فى المدرس ،،ولى امر بييجى يتخانق مع المدرس ،،مدير مش قادر يحمى المدرس ،،يعنى بإختصار المدرس بقه ملطشه

٤- المتابعات اللي بتيجى عاوزة مدرس مثالي بغض النظر عن همومه المادية ،،وانا مش ضد ده بس ادوه حقه الاول وبعدين حاسبوه ،،،والله انا كان معايا مدرس بيشتغل فرد امن طول الليل وييجى المدرسة الصبح مهيس لأنه منمش طول الليل .

٥- المدرس هو شخص عادى في رقبته اسرة ومحتاج يصرف عليهم فبيضطر يركب موجه الدروس الخصوصية ويمد ايده لولي الامر وعالرغم انه بيبذل مجهود خرافي لكن دايما ولي الامر شايف ان الفلوس دى مش من حق المدرس وباصص فيها وبيدعي عليه كمان،،،،طيب يعمل ايه المدرس الغلبان

٦-نسبه المدرسين المتنعمين من الدروس قليله جدااا واغلبهم مش مدرسين اساسا وفاتحين سناتر بيلموا بيها الطلبه ،،والطلبه بيحبوا السناتر عشان يتصاحبوا ويكراشوا ع بعض ..

٧-الوزير بتاعنا كان صريح اول ما جه وقال ان المدرسين حراميه ،،يعنى ده رأيه في المدرسين وبناءا عليه كانت كل تصرفاته عدوانية مع المدرسين وطبعا قوبلت تصرفاته بالسكوت من قبل المدرسين ،،، ونقابتنا لا حول لها ولا قوة

٨- مكافأة الامتحانات بناخدها ملاليم واحنا اللي بنراقب وبنصحح وبندخل كنترول ،،،وسبحان الله موظفين الوزارة بياخدوها ٩٠٠ يوم واحنا ٢٠٠ يوم ..وعجبي

٩- الاساسي واقف ع ٢٠١٤ والخصومات ع ٢٠١٩ ...ولا حياه لمن تنادى ،،،البرلمان ووزارة الماليه ووزارة التربيه والتعليم بيرموها ع بعض ومتوهينا وسطيهم ....وكمان مرة عجبي

١٠- لو اعتذرنا عن امتحانات الثانويه اللي بتجيلنا في اخر الدنيا وبنتقاضى ملاليم ؛ نبقي خونه للوطن

١١- لازم نعترف ان بعض مدرسينا بيسيئوا للمدرس ولكن دول قلة لاتعبر عن الاف المدرسين ولو اوضاعهم المادية اتظبطت انا واثق انهم هيبقوا منضبطين جداااا

١٢- والله الواحد لو قاعد في ميكروباص بيسمع الناس بتتكلم بأبشع الكلام عن المدرسين ومدى كرههم للمدرسين وده طبعا بسبب الدروس ...يعنى الحكومه بتدى المدرس ربع مرتبه وتقوله كمل مرتبك من جيب ولى الامر وتطلقهم ع بعض وتخلع هي......التعليم يحقق نتايجه اذاى وكل اطراف العمليه التعليميه كارهين بعض ،،مدير ومدرس وطالب وولي امر

عرفتوا ليه احنا بنعانى ولا نقول كمان ،،،ودى نقطه في بحر مما يعانى منه المعلم صاحب الرساله السامية ،،اللي اتحول لمتسول وشحات ونكرة فالمجتمع،،،، لو عاوزين تحسنوا التعليم إبدأوا بالمعلم لانه هو محور العمليةالتعليمية ،،،ووفقوا اوضاعه ورجعوله ثقته في نفسه وشوفوا النتيجه......اتحدوا يامدرسين وكفايه خلافات ومتستنوش خير ولا من نقابه ولا من وزير ....لازم وقفه جامدة عشان صوتنا يوصل ...نكون مجموعه مستقله مننا ،،من الناس اللي فعلا متضررين زينا وحاسين بأوجاع المدرسين ...ونقابل الرئيس نفسه ومنهداش اللا لما نرسي ع حل ......والله العظيم قربنا نشحت