عاجل.. تعرف على كيفية ضم المدد السابقة للمعلمين فى 15 معلومة
الأحد 04/فبراير/2018 - 11:01 م
نشرت صفحة معلمون ضد الخصم 15 معلومة عن كيفية ضم المدة السابقة للمعلمين وجاءت المعلومات كالتالى:
سبب هذا البوست أنه وصل لنا العديد من الإستفسارات عن كيفية وخطوات التقديم لضم المدد وإستفسارات اخرى بعد أن تم الضم فهنجمع هنا كل وجميع الخطوات اللازمة والطريقة الصحيحة لضم المدة.
أول حاجة حابب أنوه عنها إن ف كتير قال إنه ذهب وضم المدة عن طريق مكتبة اسمها الخبير والمكتبة دى ضمت فترة المعلم المساعد فقط وإن فترة الحصة والعقد الشامل لازم ترفعلها قضية دا كلام غير صحيح تماما وأى حد حصل معاه كدا لازم يضم من تانى فترة الحصة والعقد الشامل.
1- إيه الفترة الى هنضمها ومين له حق الضم؟
الفترة الى هتضم هى أى فترة قبل فترة المعلم المساعد سواء كانت بالحصة أو بالعقد الشامل
والضم دا لأى معلم بأى قرار يعنى لأى حد
بداية من معلم مساعد ، معلم ، معلم أول،
معلم كبير.
2- يعنى فترة المعلم المساعد لا تضم ؟
حسب الإعلان الرسمي على موقع الأكاديمية إنها لا تضم لأنها كدا كدا هتضم سنتين لأى معلم بأى قرار من تاريخ تعيينه على درجة معلم.
ولو ضفتها خلاص مش مشكلة لأنها مش مطلوبة
3- هل الى ضم المدة عن طريق حكم قضائي يضم تانى ؟ ولو ضميت أرفع قضية برضه ؟
كل ما يقال في هذا الموضوع مجرد إجتهادات شخصية لكن أنا عن نفسى واخد حكم وضميت تانى عن طريق الموقع عادى مفيش مشكلة محدش عارف بكره ممكن يحصل إيه
ولو حد رافع قضية ومنتظر الحكم يضم برضه ويسيب القضية شغالة
ولو حد مرفعش قضية يضم وينتظر يمكن هذا الضم يغنى عن القضية.
4- متى اخر موعد للضم وأضم منين ؟
آخر موعد للتقديم يوم 15/2/2018
وعادى ممكن تقدم من موبايلك أو أى كمبيوتر أو لاب أو تاب خاص بك.
معرفتش خالص يبقى من أى مكتبة أو سايبر .
معرفتش خالص أبعتلى بياناتك وأنا تحت أمرك هساعد أى حد مش عارف يسجل
5- إيه الى هيحصل بعد إنتهاء التسجيل ؟
الوزارة هتخاطب جميع المديريات على مستوى الجمهورية لإستلام أوراق كل من ضم المدد والتأكد من صحة ما تم تسجيله وإن شاء الله ممكن يتم صرف فروق لهذه السنين زى ما بعض المحافظات عملت
وف أول تعليق هتجد صورة فاكس بالكلام دا.
6- كيف أضم المدة ؟
هتضغط على هذا الرابط
http://teacher.emis.gov.eg/
emp_teacher/
ثم تدخل الكود والرقم القومى والرقم السرى الخاص بحضرتك
7- إيه المطلوب لضم المدة ؟
مطلوب صورة العقد الشامل أو إفادة بالمدة أو إستمارة 103ع ح تكون مختومة من المدرسة التى عملت بها وقت هذه الفترة وتختم من الإدارة وإن لم تتمكن يكفى ختم المدرسة مؤقتا لحين تقديم الأوراق للإدارة بعد الإنتهاء من التسجيل ومينفعش لا صور مكافأة ولا إقرار قيام بالعمل.
ف أول تعليق هنزل صورة إفادة وصورة إستمارة 103ع ح ودى بتكون ف أى مكتبة أمام الإدارة.
8- ممكن أجمع المدارس ف إستمارة واحدة؟
اه ممكن تجمع كل المدارس ف إفادة أو استمارة واحدة وكل مدرسة تختم أمام مدتها
9- بلاقى مشكلة الصورة أكبر من 1 ميجا ؟
عندك حلين تنزل برنامج لتصغير حجم الصورة اسمه Photo& Picture Resizer ودا على جوجل بلاى وبسيط خالص ف شغله أو تبعتها لأى حد على الواتس أو الماسنجر وأحذفها من عندك وخليه يبعتهالك تانى من عنده.
ف أول تعليق هنزلك صورة البرنامج.
10- عند إختيار المدرسة أختار أى مدرسة ؟
هتختار المدرسة الى عملت بها وقت هذه الفترة وليس المدرسة الحالية لأن كتير عمل كدا
إلا إذا كان فترة الحصة والعقد الشامل كانت ف نفس مدرستك الحالية.
11- أكتب إيه ف سبب الإنتهاء ؟
لو ف مدد كتير هتفصل بين كل مدة وتكتب السبب إنتهاء العام الدراسى لحد آخر فترة قبل فترة المعلم المساعد هتكتب سبب الإنتهاء التعاقد لوظيفة معلم مساعد
12- إيه الفرق بين العقد الشامل والمعلم المساعد ؟
العقد الشامل كان مع أغلب معلمى قرارات 53/74/244 ودا كان بعد فترة الحصة وكان القبض فيه 174 بعد كدا اتعمل عقد معلم مساعد بعد كدا ف قرارت عملت عقد شامل لغاية ما تم ترقيتها لمعلم فلازم نفرق بينهم
يعنى العقد الشامل حاجة
وعقد المعلم المساعد الى ف ناس بتطلق عليه عقد مميز حاجة تانية.
13- دخلت بيانات أو صورة خطأ أعمل ايه ؟
ممكن تعديل عادى
هتدخل على صفحتك وتحذف الطلب القديم وتسجل طلب جديد ببيانات صحيحة من تانى.
14- هل تضاف فترة المدارس الخاصة؟
نعم تضاف طالما مع حضرتك أوراق إفادة بالمدة الى قضتها هناك ودى بنغيرها من التبعية تختار خاص عربى أو إنجليزي على حسب عملك
15- أنا عملت كل الكلام دا وضميت المدة ؟
خلاص كدا تمام متعملش حضرتك حاجة تانية.
