نداء للوزير.. حذف منهج ابريل للابتدائية والاعدادية

لان الوقت لا يتناسب مع الكم ثم امعاناً فى ظلم ابنائنا تم تعديلها كالتالى الخطة من على موقع الوزارة الرسمى المفترض ان امتحانات النقل تبدأ ١٣ مايو وبهذا يكون الترم ٩٣ يوما فوجئنا بتقدم الامتحانات لـ ٢٩ ابريل يعنى اقتطعنا من ايام الدراسة الفعلية ١٤ يوما واصبحت ٧٩ يوما ومع ذلك هناك اصرار على عدم الغاء اى جزء للشهادات العامة..

ممكن سيادتك تستعين بمستشار الرياضيات وتطلب منه يحل هذه المعضلة لو قسمنا الـ ٧٩ يوما على الاربع او الخمس وحدات بتوع كل مادة هنلقى ان الوحدة محتاجة فى المتوسط حوالى ١٥ يوما لشرحها نجيبهم منين بقى ممكن حد من السادة المستشارين يجاوب حضرتك على السؤال ده لو فى اجابة منطقية اقتنعت سيادتك بها مش هنطلب اى تعديل ولا حذف يا فندم..

أولادنا اطحنوا ومافيش رحمة من جميع الجهات مابين مدارس متراخية فى الادارة والاشراف لمناهج بيحفظوها بدون فهم لتأخير وتخبط فى اتخاذ القرارات من الموجهين ووصولها للمدارس زى موضوع سؤال القصة فى العربى اللى حتى الان لم نعرف كينونته وهنتفاجأ به فى الامتحان..

 

حضرتك صاحب الامر وذو الكلمة العليا اعمل اللى فيه مصلحة الاولاد وخفف عنهم وبلاش تساعد فى ضغطهم اكتر ما هما مضغوطين وتدميرهم نفسيا وجسديا طبعا فى اجماع ان اللى حط المناهج عقول جامدة ممكن تكون عبقرية فى مجالها النظرى لكن ماعندهاش القدرة ولا الملكة للتعامل مع السن الموجهة له المناهج، حيث ان هناك اجماع من سيادتك قبل اولياء الامور على ان المناهج غير صالحة للاستهلاك الادمى بنرجع تانى ليه ليهم فى تقرير مصير اولادنا..

يا سيادة الوزير نحن لا نريد الدوران فى فلك المستشارين سيادتك صاحب القرار ومن سيسأله الله عن ظلم هؤلاء الاطفال نطلب رحمتك وحكمتك وعقلك فى حل هذه المعضلة الرياضية المتعلقة بالوقت والمنهج واهم منهم الاستفادة الحقيقية للاولاد ما الشئ الحيوى المؤثر فى هذه الاجزاء البسيطة التى نطالب بالغاءها ولا يمكن تعويضه فى الاعوام القادمة برؤية مختلفة ومنهج اكثر فاعلية..

 

نحن كاولياء امور نضع الامر بين يديك لاننا نعلم اختلاف رؤية سيادتك وقدرتك العلمية وعقليتك المستنيرة التى ملأت قلوبنا امل حين سمعنا بتوليك هذه المهمة الثقيلة.. سيادة الوزير ارتضيت حمل امانة مستقبل ابناءنا وانت اهل لها فلا تخذلهم وتتجاهل استغاثاتهم من تحت اطلال الكتب والمناهج المكدسة فوق اجسامهم الضئيلة.. وفقكم الله لما فيه الخير لابناء مصر جميعا وسدد خطاكم وثبت اقدامكم وقوى عزيمتكم..