صرخة اب ملكوم للرئيس : ابني كره حياته بسبب وزيرغير مسئول عايز اعلم ابني ده كويس ياريس

صرخة اب ملكوم للرئيس : ابني كره حياته بسبب وزيرغير مسئول عايز اعلم ابني ده كويس ياريس

وجه خالد صفوت أدمن صفحة ثورة أمهات مصر علي المناهج التعليمية رسالة الي الرئيس عبدالفتاح السيسي عبر صفحته الشخصية علي موقع التواصل الاجتماعي " الفيس بوك " لانقاذ نجله " محمد " قبل فوات الاوان

 قال فيها :

ده ابنى ……… يا ريس

فرحة حياتى…….. و حلم عمرى

حلم عمرى يا ريس اللى تنازلت عن حياتي و احلامى عشان خاطر حلمه و عمره

فاهمنى يا ريس……. فاهم معنى كلامى

فاهم يعنى ايه أب أو ام يتنازل عن أحلامه عشان خاطر ابنه

اكيد فهمت ان عمرى ما هتنازل عن حلم ابنى

عشان ابنى هو حلمى بكره و حلم بلدى

انا مش بطلب ان ابنى يكون مهندس او دكتور او ضابط ماهو مش كل اولادنا هتكون دكاترة او مهندسين او وزراء او مرموقين فى المجتمع.

انا طلبي بسيط يا ريس

انا طلبي اعلم ابنى كويس و يتربى كويس ويطلع زى ما يطلع وزير او فرد امن او سواق باص مش مهم

المهم انه يكون انسان واعى مثقف عنده اخلاق يحب وطنه عشان وطنه بيحبه و اوفرله تكافؤ الفرص

مش عايز ابنى يا ريس يسب ويلعن فى البلد و يكون ناقم عليها بسبب مناهج عقيمة او بسبب موجة حاطط امتحان يعقد الأولاد لمجرد التعقيد

مش عايز ابنى ياريس يكتب فى ورقه انا زهقت انا قرفت انا اتخنقت انا عايز اهج من البلد او انا محبط

محبط يا ريس و هو لسه فى اول عمره

عارف يعنى ايه يا ريس

عارف يعنى ايه طالب فى ثانوى١٧ سنة يكره حياته عشان وزير غير مسؤول كل يوم يطلع قرار يدمر بيه نفسية أجيال

عارف يا ريس ضرر ده بكره ايه و اللى بنعانى منه دلوقتى الطالب الذي يتحدى الظروف دى و ينجح هيهرب بره يا ريس يشق طريقه فى حته تانى و يخدم بلد تانيه غير بلده

اما الفاشل يا ريس بكره يبقى وزير ويكمل تدمير اللى قبله

كلمة أخيرة يا ريس

أنقذ الوطن ياريس بالتعليم و التربية و بناء الانسان اولا

و مش عايز اسمع منك يا ريس كلام تانى زى

منين و بكام

يعمل ايه تعليم فى وطن ضايع

عايز اسمع منك يا ريس

هنتحدى الظروف

هنحارب الفساد

هنطور تعليمنا و نربى اولادنا

رسالة من اب عاشق تراب الوطن