عام ٢٠١٧ عام المنتج المصري

تعالوا نحسبها بالعقل وبهدوء .. احنا عندنا في مصر ما شاء الله مصانع بتنتج كل حاجة تقريبا وبتغطي معظم احتياجاتنا من منتجات غذائية وملابس ومفروشات وأدوات تنظيف وادوات منزلية وشخصية وأقمشة وخيوط وبويات واثاث وأجهزة كهربائية وسيراميك وزجاج واسانسيرات وأدوية وعربيات واتوبيسات ودراجات وغيرها وغيرها .. طبعا غير فاكهتنا وخضرواتنا ..

طيب ما تيجي نتفق علي حاجة ونعمل تجربة بلغتنا في البحث العلمي !! هانجرب كلنا مع بعض ولمدة سنة ان احنا ما نشتريش الا المصري في كل شئ والغني قبل الفقير يستحمل السنة دي ويشتري المصري فقط ..

انا ليه بقترح كدة ؟ لان ده معناه المصانع المصرية ها تشتغل بكامل طاقتها وده معناه فرص عمل للناس اكثر ومعناه كمان هايقل الطلب علي الدولار وبالتالي الجنيه يقوي وشئ طبيعي الاسعار هاتقل علينا وكل ده هايشجع مستثمرين اخرين يفتحوا مصانع تانية جديدة ويزيد انتاج اكثر وشغل اكثر وهكذا

طيب كدة في الاخر مين الكسبان الاكبر ؟ الحقيقة احنا كشعب طبعا .. يالا بينا نتفق ونبدأ من النهاردة باذن الله نسأل قبل ما نشتري اي حاجة دي مصنوعه فين ؟ ونتاكد الاول ونشتري المصري فقط .. وكمان تعالوا نعتبر "عام ٢٠١٧ عام المنتج المصري" .. والله نقدر المسالة مسالة إرادة وقرار ويلا بينا وانا هابدأ بنفسي من النهاردة واسرتي معايا باذن الله