مي الغيطي : حصلت علي 95% في الاعدادية ..ومثلي الاعلي باسم يوسف
الثلاثاء 18/يونيو/2013 - 04:05 ص
حوار محمد الدهشوري : قالت مي الغيطي لايوجد انسان يقدر يعيش بدون هواء او ماء .. التمثيل هواية والماء هو التعليم , من غيرهم هموت , علشان كدة ولأني بحب الحياة لا هبطل تمثيل ومستمرة في الدراسة ..و الحمد لله حصلت علي 95% بالشهادة الاعدادية, وح اكمل دراسة لان حلمي ابقي زي باسم يوسف
,
ull موقع زي السبورة ممكن يساعدك ازاي في المسيرة التعليمية ؟
هو في العصر دة المجد كل المجد للي لسة متمسك بالكتاب , الحياة بقت سريعه وكلها الكترونية , الفس بوك وتويتر , فكون ان انا الاقي حاجة علي الانترنت تساعدني اني اذاكر واراجع بمنتهي السهولة فهذه حاجة منتهي الابداع , وثانيا انتم عاملين نوع من الألفة يعني انا مش حاسة اني في موقع انا حاسة اني قاعدة في سنتر وباخد درس , ودي حاجة عظيمة علي فكرة , وانتم لكم مستقبل جامد .
ull طيب مي الممثلة هادية , مي الطالبة عاملة ايه ؟
هو اولا انا كممثلة لسة جوايا حاجات كتير لسة مطلعتش , انا مدمنة تمثيل ,واتمني الاستمرار في الادمان ده, التمثييل ادمان لذيذ , مي الطالبة شقية , ومغلبة كل المدرسين , لا واللي يضحكك تلاقي المس سايبة كل دة وتقولي كنتي هايلة في كابتن هيما يابت يامي , بس انا مستمتعه بكل زمايلي بحياتي التعليمية , اتتمني اني ابقي دكتورة شاطرة .
ull نرجع للسينما بقي : الدور اللي نفسك تعمليه ؟
نفسي اعمل دور واحدة عندها انفصام في الشخصية , واي دور مركب بيلعب علي الجانب النفسي , لأن دة بيوضح قدرات الممثل قوي , ومش اي حد ممكن يعمله .
ull مثلك الاعلي في التمثيل , وفي التعليم ؟
في التمثيل ميار اختي , في التعليم باسم يوسف , نفسي ابقي دكتورة واشتغل في الميديا .
ull كلمة اخيرة ل السبورة يامي ؟
استمروا , اوعوا توقفوا هنزعل بجد ومستنيين منكم كل جديد
, واتمني اتمني ان كل الناس تستفيد التجربة دي , وعاوزة حوار تاني معايا وانا اول الجمهورية علي الثانوية العامة .
