الى الدولة.. التعليم إصلاح وترشيد

وزارة التعليم هى بيتنا اللى احنا دايما بنحترمه ونقدره وله كل التقدير.. بيتنا وزارة التعليم يشهد نشاط مستمر مع وزير ميدانى حقيقى ومتفاعل مع كل شىء.. وزير التعليم هو اب وانسان ومهتم وناشط وكل شىء يخص التعليم اجتماعيا بجانب كونه وزير.. الوزير نجح فى أمور كثيرة ودايما يستمع للتعديل والتنظيم الجيد ودايما يقول ( نحن منفتحون على جميع الاراء ) شكرا سيادة الوزير.. 

واقول هنا اننا نقدر نوفر ما يصل ٧٠ مليار جنيه فى التعليم لو عدلنا فى بعض القرارات وهذه التعديلات ممكنه.. وهذا الفكر ليس ضمن تفاصيل المقال.. إذا تمت النظرة لذلك.. لكن نتمنى النظر فى أمور منها:-
١- ضرورة عمل إصلاح ادارى حقيقى وفعلى وتقليص عدد العاملين بالادارات والمديريات من خلال مقترحات بتقليص عدد الاقسام ودمجها مثلا:
- قسم الاعارات يصبح جزء من عمل ادارة الموارد البشرية بالادارات والمديريات  والاعلان عن الاعارات يصبح من خلال الأقسام الخاصة بكل مرحلة.. 
- التخطيط والمتابعة والتخطيط والمشروعات.. ليه م يبقوش كيان واحد..
- القياس والجودة يصبح بديلا للمتابعة وتقويم والأداء وارجعهم مدارس لتقليص العجز 
- قسم البيئة والسكان يتم توزيع عملة على التوجيه المختص سواء علوم او دراسات.
- الغاء أقسام التنسيق  وتحويل اختصاصها الى الموجهين الأوائل ورؤساء أقسام المراحل او ندمجها فى كيان واحد بدلا من تنسيق ابتدائي واعدادى وثانوى..

٢- ضرورة تعديل قرار وزارى ٢٠٢ اصبح حتميا.. لان لو تم استحداث مدرسة او تم إنشاء مدرسة جديدة بيكون صعب انقل ليها معلمين لوجود عجز فى مدارس الادارة وابقى خالفت قرار ٢٠٢.

٣- ضرورة اصدار قرار تنظيمى الزامى لكافة الموجهين ومديرى المدارس والمتابعة بان يقوم كل معلم بالمرحلة الاعدادية والثانوية بتدريس منهجين على الاقل.. ليه ؟ علشان مفيش مدرس يدرس ٣ اعدادى بس او ٣ ثانوى بس وحضراتكم عارفين الباقى بعد كدا لو اشتغلوا منهج واحد خاصة ٣ع و٣ث..

٤- ضرورة عمل تعديل تشريعى فى قانون الكادر.. ليه ؟
مفيش.. مفيش.. مفيش.. يعنى ايه ؟
مفيش وظيفة فى الكادر اسمها رئيس قسم او مدير مرحلة او متابعة او مدير عام.. والدليل تلك الوظائف ليس لها بطاقة وصف وظيفى فى قرار وزارى ١٦٤ لسنة ٢٠١٦.. وكمان راجعوا قانون الكادر من ٢٠٠٧ وكل تعديلاته حتى تاريخه وهاتو مسميات تلك الوظائف داخله

٥- سرعة تعديل او تحديث قرار وزارى ١٣٦ و١٣٧ و١٣٨ لمعرفة النصاب الاسيوعى لكل مادة وخاصة ان الصف الثانى الثانوى اصبح شهادة وهناك مواد جديدة محتاجين اعداد وتجهيز معلمين لتلك المواد بالثانوى العام وان يتم التعديل او التحديث قبل اول يوليو حتى يتسنى حسم قرارات النقل والندب. للتجهيز الجيد للعام الدراسى القادم.

٦- التقييمات فكرتها ممتازة ومتميزة لكن نتمنى تقليص عدد التقييمات ليصبح ٨ تقييمات فى الترم  الواحد حد اقصى.. ليه ؟ 

ادينا شفنا طوارىء الجو واجازات الترم الثانى.. وكمان ح نوفر تكاليف طباعة للدولة.. وكمان اتمنى ضرورة عمل توازن والتخفيف عن معلم المرحلة الابتدائية لان نصابه كبير من الحصص عن باقى المراحل وعليه تكليفات ادارية اكتر من باقى المراحل.. معلم الاعدادى والثانوى يرصد واجبات وتقييمات وسلوك ومواظبه أسبوعيا بينما معلم الابتدائي يرصد ماسبق بالإضافة للمهام الاداءية وكراسة النشاط وتصحيحهم.. ف نتمنى التخفيف عن معلم المرحلة الابتدائية.. ف نتمنى كرؤية فقط أن تصبح الصيغة موحدة لكل المراحل درجات اعمال سنة ل واجبات وتقييمات وكراسة الفصل / النشاط..فى المراحل الثلاث.. بمعنى أدق وشامل - توحيد السجل للمراحل الثلاث ابتدائي واعدادى وثانوى..

 ٧- ضرورة مخاطبة  كافة الجهات المختصة لسرعة انتهاء إجراءات التعاقد بمسابقة الى٣٠الف معلم.. المرحلة الخامسة..
وكذلك التوجيه الوزارى بضرورة توزيعهم فى اداراتهم طالما يوجد عجز سواء الدفعات الأربعة السابقة او الدفعة الخامسة..
يعنى سؤال.. هل الشاب فى مقتبل حياته يضيع جزء كبير من مرتبه على المواصلات او ان المعلمة تاخد مواصلة ٦٠كم للوصول لعملها.. طب أولادها يقدروا يستحملوها غيابها عن البيت من ٦ الصبح ل ٤ العصر يوميا..؟

٨- دعم مديرى المدارس وتقليل الضغط عليهم.. زيارات توجيه.  زيارات القياس والجودة. زيارات المتابعة. زيارات رئيس القسم. زيارات لجان المديرية. زيارات لجان الوزارة. زيارات مدير الادارة او وكيل الوزارة وقيادات المديرية.. طب المدير يشوف شغل المدرسة امتى ؟

٩- دعم الموجهين.. ح تقولى ازاى ؟ اقولك الموجه نصابه ٤٠ معلم يشرف عليهم.. دلوقت بيشرف على ال ٤٠ معلم بخلاف معلمى الحصة.. وتقولوا الموجه.... ؟ يعنى واخد شغل واشغال فوق شغله وشبعان كلام من..... وكمان مش بياخد حافز تدريس.. طب ده ايه ؟

١٠ - ندخل بقى ع الماليات.. مطلوب إصلاح مالى على منظومة مكافأة امتحانات الشهادة الاعدادية والثانوية.. لأنها محتاجة إعادة نظر وكذلك سعر تصحيح الورقة الامتحانية  .. حتى تصبح أكثر جاذبية ونقلل كميات الاعتذارات.. كل ما سبق رؤية قابلة للدراسة او الرفض..