استاذ بجامعة بني سويف يقدم للطلاب عشرة قواعد ونصائح للمذاكرة والنجاح والتفوق

الامتحانات تطرق الابواب وقلوب الطلاب ترتعد خوفا من مواجهة ورقة الاسئلة والقلق يسيطر عليهم خوفا من ضياع مستقبلهم ، وهناك من يؤثر التوتر عليه ويفقد كل شئ ،

قال الدكتور محمد كمال عضو هئية التدريس بجامعة بني سويف ، زي ما نكدنا علي الطلبة ببوست المراقبة في الامتحانات نقولهم كلمتين لوجه الله عن ازاي يقدروا يذاكروا وينجحوا ويجيبوا تقدير:

اولا: الوقت منتهاش لسة فيه وقت حتي لو لسة مبدأتش مذاكرة لسة بردو فيه وقت تلحق نفسك فيه. لو حطيت في دماغك ان مفيش وقت وخلاص كل حاجة راحت مش هتذاكر. ركز بس في الايام الجاية.

ثانياً: قسم وقتك كويس. مقرر عليا كام موضوع...فاضل كام يوم علي الامتحان...تقسم عدد الموضوعات علي عدد الايام وتسيب يوم في النهاية للمراجعة.

ثالثاً: وانت بتذاكر كل ما زادت عدد الحواس اللى بتذاكر بيها كل ما زادت الفايدة والتجميع. يعني ممكن تذاكر بعينك بس الاحسن منها تذاكر بعينك ولسانك يعني تقرا وتسمع لنفسك اللى بتقراه. والافضل انك وانت بتعمل ده يبقي جنبك كشكول تطلع فيه العناوين والنقط المهمة في شرح العناوين. كدة شغلنا 3 حواس البصر والسمع واللمس. وطلعنا العناوين والمهم داخلها.

رابعاً: بعد ما تخلص كل موضوع تراجع العناوين والنقط المهمة بداخلها اللي طلعتها في الكشكول وتحفظها صم. لان العناوين لازم تتكتب ولان النقط المهمة بداخلها هي اللى هتفكرك الشرح

خامساً: اخر اليوم خلصت الموضوعات اللى انت محدد انك هتذاكرها النهاردة امسك الكشكول وراجع مرة تانية علي العناوين والنقط المهمة. واعمل لنفسك اختبار سريع بانك تكتب كل موضوع بعناوينه بنقاطه فقط والموضوع اللى تلاقي نفسك ناسيه راجعه تاني بشكل سريع.

سادساً: اليوم اللى انت عاملهم للمراجعة تقرا فيهم مرة تانية كل الموضوعات وتراجع حفظ العناوين والنقاط بشكل كويس بحيث انك متبقاش ناسي حاجة.

سابعاً: النوم والصحيان حسب ما انت متعود لكن ليلة الامتحان مفيش حاجة اسمها سهر مهما حصل. حتي لو مش عارف تنام افرد في السرير لغاية ما تنام. انما تقول هراجع بالليل واروح الامتحان مطبق هتضيع اكتر من 30% من تركيزك في اللجنة والكارثة لو امتحانك الضهر هتلاقي نفسك وانت في اللجنة حاسس بصداع وان وشك سخن ومش فاكر اي حاجة فنام ليلة الامتحان بدري واصحي بدري وراجع الكشكول اللى فيه العناوين والنقط المهمة بس ولو فيه موضوعات حاسس انها في الامتحان ركز عليها اكتر ومفيش مانع تقراها بسرعة

ثامناًً: طبيعي انك تحس انك ناسي كل حاجة ...متخافش ده احساس طبيعي لان جنابك مش مذاكر من اول الترم زي كل الطلبة دلوقت... لكن في الحقيقة انت مش ناسي اي حاجة كل ما في الامر انها اتركنت في جانب من المخ اسمه هامش الشعور ووقت ما تحتاجه هتلاقي نفسك افتكرته.

تاسعاً: يوم الامتحان تروح بدري بس مش بدري اوي وتقضيها مع اصحابك. تروح قبل ميعاد اللجنة بوقت كافي ويفضل مفيش كلام مع اصحابك قبل اللجنة علشان هتشوشوا علي بعض كل واحد يخليه في حاله واتكلموا بعد اللجنة ما تخلص وراجع علي ورق العناوين والنقاط المهمة اللى معاك.

عاشراً: في اللجنة:

1- هاتيجي ورقة الاجابة الاول سطرها تسطير كويس.

2- هاتيجي ورقة الاسئلة تقرا كويس جدا ركز اوي اوي فيها علشان قراءة وفهم الاسئلة هي نص الاجابة.

3- تشوف لو فيه اجباري ولا كله اختياري.

4- تحدد الاسئلة اللى انت متأكد منها جدا وتمسك كراسة الاجابة اخر صفحة وتكتب في اول سطر هامش وتكتب العناوين والنقاط المهمة للاسئلة اللى هتجاوبها بسرعة قبل ما تنسي لان فجأة هتلاقي كل الاجابات في دماغك وبعد دقايق هتلاقي كل حاجة اتبخرت فالحق اكتب العناوين بسرعة في الهامش علشان متنساش وترجع لها في اجابتك.

5- تبدا بأجابة افضل الاسئلة بالنسبة لك. واجابتك تبقي منظمة وخطك واضح وبلاش تلعب مع الدكتور وتفتكر انه مش هيقرا الاجابة.

6- متجاوبش عن اكتر من عدد الاسئلة المطلوبة لان الدكتور مش هيقرا الاجابات الزيادة

7- كل سؤال تجاوبه تراجع اجابتك وتعلم بعلامة صح علي ورقة الاسئلة ادامه علشان تعرف انك خلصته.

8- دايما تخلي معاك ساعة علشان تشوف الوقت وتقسم وقت الامتحان علي عدد الاسئلة المطلوب الاجابة عليها وتعمل حسابك يبقي فيه نص او تلت ساعة علي الاقل في الاخر تراجع فيه.

9- الاجابة دايما بلونين الازرق والاسود واحد منهم للعناوين والتاني للشرح..

10- الموبايل مقفول تماما متقولش ده صامت هتلبس محضر شروع في غش اقفله خلص وريح دماغك من وجع الدماغ ومن قصيره سيبه في بيتكم احسن.

#‏الكتابة_بالاسود_والازرق_عميتونا_بالفسفوري_والبمبي_والفحلقي

#‏نظري_راح_بسبب_الفسفوري

#‏سيب_الموبايل_في_البيت_انت_مش_دكتور_ولادة_والست_هتتصل_بيك_عشان_بتولد

#‏والله_ما_بناخد_الورق_البحر_والورقة_اللى_تقع_في_البحر_ساقطة_واللي_علي_الشط_ناجحة

#‏مش_بنوزع_الورق_علي_ولادنا_واللى_تاخده_البت_ناجح_واللي_ياخده_الواد_ساقط

#‏لو_ذاكرت_اد_ما_بتقعد_علي_الفيس_كنت_جبت_امتياز_يا_ناصح

#‏الوقت_اللى_هزرت_فيه_علي_البوست_ده_كنت_خلصت_فيه_موضوع_يا_فالح