إلى الحكومة.. التعليم والمعلمين

الدولة تبذل جهودا كبيرة من أجل راحة معلمى مصر.. لكن هناك اجراءات وقرارات تظهر فى وسط الطريق تجعل السادة المعلمين يتمنوا ان يخرج من يضع حلولا لمشاكلهم.
نتمنى أن تكون الحكومه هى الحل والحل النهائى وان تقرر بسرعة لأن وزارة التعليم تنفذ قرارات وقوانين الدولة.

ومن بعض امنيات المعلمين 

١- سرعة اصدار قرار ترقيات دفعة ٢٠١٨. هى فين ؟ يا ريت سيادة الوزير يعمل اجتماع بقيادات الأكاديمية ويسألهم فين ملف ترقية دفعة ٢٠١٨ ويصدر القرار الوزارى بسرعه ؟ يلغى جولة من جولاته ويتوجه للاكاديمية لمعرفة اخبار تؤقية ٤٠٠ الف معلم. الدفعة دى مر اكثر من سنة ونصف على استحقاقها الترقى ولم تترقى ورغم انتهاء اجراءات الترقى لم يتم اعتماد قرار الترقية حتى تاريخه.
٢- ترقية المعلمين دفعة ٢٠١٩ وذلك لاستحقاقهم الترقى منذ يناير الماضى 
والنقطتين اللى فاتوا يمثلوا اكثر من نصف معلمى وزارة التربية والتعليم.
٣- بعد الترقى ليه الادارات والمديريات  بيطلبوا تحليل مخدرات من المعلمين لاستكمال اجراءات الترقى ؟ وعند التقدم لوظيفة اشرافية بالادارات او المديريات بيطلبوا تحليل مخدرات. طب ليه ؟
اولا المفروض ان التحليل مفاجىء وليس فى وقت يحددوه ل الموظف  ثانيا هو احنا لاقيين ناكل الاكل العادى علشان نتعاطى مخدرات ؟ دى تكاليف مالية فوق طاقتنا  كمعلمين.
٤- ليه فى القرار ١٣٧ و١٣٨ زودت حصص مادة اللغة الانجليزية بمقدار حصة / نصف فترة بالزيادة عن العام الدراسى السابق رغم انك م زودتش المنهج من تانية اعدادى ل تالته ثانوى. ايه سبب زيادة الحصة دى ؟
٥- يا ريت تطالب الدولة بمسابقة معلم مساعد استثنائية عاجلة  بمقدار ٥٠ الف معلم للمواد الأساسية وهى  ٨ الاف لغة عربية و١٢ الف على حدة علوم ولغة انجليزية ورياضيات و٦ الاف دراسات اجتماعية. واللى بينا احصائيات العجز والزيادة.
٦- ضرورة تغيير شروط صرف حافز الاداء وعلاوة الاعباء الوظيفية  اللى عاملين قلق للمعلمين ؟ محدش فى مصر بيتعرض للشروط القاسية دى.
٧- تغيير طريقة ترقى المعلمين اللى مفيش حد فى العالم بيتعرض ليها سوى معلمى مصر سواء فى طريقة الترقى او مدة الترقى؟
٨-  وضع حلول عاجلة لنقص عمال النظافة والاداريين بالمدارس. احنا قربنا نكنس بنفسنا.
٩- زيادة عدد المتعاقدين فى وظيفة معلم مساعد وخاصة العجز الشديد فى مواد العلوم والرياضيات وسرعة إنهاء اجراءات التعاقد وتسليمهم العمل.
١٠- عمل تأهيل وظيفى وتربوى وتغيير مسمى وظيفى للمعلمين والاخصاءيين لسد العجز فى تخصصات شديدة العجز.
١١-  إعفاء اى نوع من انواع مكافأة الامتحانات من ضريبة كسب العمل لأننا مش بنحس بقيمتها بسبب الاستقطاعات الضريبية التى لا تقل عن ١٠% من قيمة اى مكافأة.
١٢- تشكيل لجنة فنية قانونية لعمل تعديل على قانون الكادر لانصاف المعلمين واسوة بمزايا قانون الخدمة المدنية.
١٣- هو ليه معلم المرحلة الابتدائية أعلى فى نصاب الحصص من معلمى المرحلة الاعدادية والثانوية ؟ نتمنى المساواة.

نتمنى أن نجد سرعة تحرك وسرعة رد فعل ايجابى نحو انصاف المعلمين لعل التاريخ يعيد نفسه ونجد خطوات تشجيعية للمعلمين مثلما فعل د/ الجنزورى فى نهاية التسعينات من القرن الماضى.