منكم لله يا دكاترة الجامعة السلبيين.

كالعادة الحق القطار لاركب في عربة البوفيه لانه لا يوجد تذاكر كالمعتاد ونسكافيه يليه الشاي (لازم تفضل تشرب طول الوقت والا هتقوم من الكرسي وده اغلي من اي مشاريب) شوية يتجمع الكمسارية وعاملي البوقيه ويبدأ الرغي العام لتعرف ان هناك عربة زيادة النهاردة علشان القضاة حاجزين لهم 5 عربيات درجة اولي علشان رايحين اسيوط وسوهاج للانتخابات (طبعا هم بيركبوا ببلاش وانا الكمسري دفعني 6 جنيه زيادة علي تمن التذكرة تطويقة )وان قاضي كان متأخر فجري ورا القطر في محطة القاهرة وكان هيقع تحت العجل لولا لحقوه والكمسري بيقول طبعا دي مليون جنيه لو مات تعويض. قلت له الحمد لله ده انسان وروح وله اهل واسرة واصدقاء مليون جنيه ايه بس.

فجأة تأبي الذاكرة اللعينة الا ان تعيدني للخلف حوالي 7 سنوات حين كنت انزل من نفس القطار في محطة بني سويف لاجدهم يتحدثون عن الدكتور المرمي في عربية الاسعاف ..سئلت دكتور ايه وفيه ايه ..عرفت ان القطر اللي قبله بنص ساعة كان فيه دكتور جامعة بينزل وقع بين القطر والرصيف والقطر قطعه ولموه واستنوا عربية الاسعاف وواقفة ادام المحطة والجثة فيها مش عارفين يروحوا بيها فين وغالبا هيودوه المشرحة.

سئلت هو دكتور في ايه وكان من صيدلة الله يرحمه.واسمه ايه..اخدت تاكسي وطلعت علي كليته وسئلت عن العميد او الوكيل وبلغت اللى كان موجود منهم ان دكتور فلان القطر داسه وعربية الاسعاف هتوديه المشرحة وقال هنتصرف حالا وبدا اتصالاته وعرفت ان الجامعة تكفلت بالأمر وكان له ابنة او ابن علي ما اذكر فقط وفي الخارج فأبلغوا اخوته وجهزوا سيارة اسعاف لنقله لمدافن أسرته. لما روحت الكلية الشيطان فضل يلعب في دماغي ان ممكن المرة الجاية اكون مكانه قلت اسئل واطمن علي بناتك من بعدك سئلت موظف الحسابات قالي معاشهم حوالي 400 جنيه ومكافأة نهاية خدمة ومعرفش ايه كله علي بعضه حوالي 20 الف.

أفقت من غيبوبة الذاكرة لاتمني أن أدخل في غيبوبة الواقع للأبد وأنا أتابع أخبار تجميد مرتباتنا إلى الأبد.

منك لله يا دولة في كل العصور.

منكم لله يا دكاترة الجامعة السلبيين.

منكم لله يا كل من لم ترعوا المسئولية من المسئولين.