التنسيق الحكومي وقلة عدد منح مدارس المتفوقين STEM أحلام الطلاب تحطمت على صخرة التعليم العالي

أحلام طلاب مدارس المتفوقين STEM  تحطمت على صخرة التعليم العالي.. لازم تكون عندك خطة بديلة لـ ستيم، بدأت ولية أمر أحد طلاب مدارس المتفوقين STEM بهذه الكلمات بعد ان أستعرض موقع السبورة لها مميزات وعيوب مدارس المتفوقين STEM مطالبة بتطبيق نظام تنسيق عادل لمدارس STEM ومنح كاملة في الجامعات الاهلية والخاصة.

طالبت نڤين محمد محمد النادي، ولية أمر الطالب يوسف محمد بمدرسة المتفوقين STEM بأكتوبر، بتطبيق نظام تنسيق عادل لمدارس المتفوقين STEM، قائلة "أن نسبة قبولك ضعيفة حسب السنة اللى فاتت التحق طالب من كل سبع طلاب متفوقين حققوا الشروط ودخلوا الاختبارات، ما يساوي 2398 من 15641 يعنى ذي ما بيتقال اختاروا خلاصة الخلاصة".

وأستطردت نفين النادي: "المفروض كده إن دول أميز 2400 طالب أخدوهم من الشهادة الإعدادية على مستوى الجمهورية، طب ايه اللي بيحصل بعدها ! بعدها بيلتحق الطالب بنظام تعليمى فريد من نوعه يكون هو المعلم والمتعلم، بدون كتب دراسية وبيخوض امتحانات صعبة جدا، وكمان بيتحمل ضغط شديد وغربة وتكاليف مادية اثناء السفر للمدرسة".

وأستكملت: "الأصعب إنه بيتحمل أعباء نفسية صعبة جدًا، وأحيانًا كثيرة تفوق نفسية الطالب وولى الأمر، شوفت طلاب وطالبات بتدخل في نوبات بكاء، ورغبه في التحويل لولا المصاريف التي تتخطي ٣٠ الف جنيه عن السنة الواحدة، واللي أغلبنا مبيقدروش يوفرها، فبيضطر الطالب يكمل في الضغط النفسي والعصبي ده ! 
أو الطالب بعد قبوله وحضوره فقط الـ سمر كامب لا يلتحق من الأساس".

ما هي الكليات المتاحة بعد مدرسة ستيم؟

صعوبة التحاق طالب مدارس المتفوقين ستيم كليات القمة

وأستكملت حديثها: "الطالب وأهله خلاص بقا داخلين ستيم ده طالب متفوق حلمه ممكن يكون أنه يلتحق بكليات الطب والهندسة بقا ذي زمايله في باقي الشهادات الثانوية!!! لكنه بيتفاجئ انه ٢٥ % فقط من طلاب علمي علوم بيدخل طب! طب اللي هو الطب البشري !!! طب وال ٨٠% ؟
ال ٨٠% بيتوزع ٤/٣ منهم على كليتي علوم وطب بيطرى وحوالى ٤٠ طالب في صيدلة وحوالي ٦٠ طالب علاج طبيعى وحوالى ٥٠ طالب طب أسنان.. دي الأرقام التقريبية لعدم شفافية اعلان النسبه المرنة ولكنها بحسابات أولياء الأمور قريبة جدا من الواقع".

طب إزاى !!!! دول أميز طلبة!!! ومناهجهم أصعب بكتير من ثانوية عامة، وبحث علمى ومشروعات وشغل صعب جدا يتحمله طالب عادى!

قالت متعجبة: مش دول بيطلعوا في التليفزيون وبيتعمل عشانهم برامج وبنفضل نبص لهم بانبهار كده ونصقف لهم.. ونقول الله يا مصر علي ولادك.. الخير جاي والمستقبل احسن طول ما فيه دول !! 
ده انا شوفت شويه طلاب ذي الفل واقفين قصاد الريس عبد الفتاح السيسي وبيشرحوا حاجات خلت الريس صقف لهم بنفسه !! واخر مؤتمر اتعمل لهم من كام يوم الولاد دول مقدمين شويه مشاريع مش ممكن حد في سنهم يعملها !! لا وكمان عاملين دراسة جدوي بالاسعار والتكاليف!!.. دي شباب برفكت !! 

بص حضرتك الطلبة دى بتنسق علي مجموعة مقاعد معينه بالترتيب مش بالمجموع، وده شىء غريب، أنت متفوق اه بس بتنافس متفوق زيك.
ومن كل خمسة منهم أربعة مش هيدخلوا الكلية اللي عايزينها وترتيبهم هيجبرهم يدخلوا كليات تانية.. هي علمية برضو وبيقولوا عليها كليات قمة، لكن للاسف مش مناسبة مع طموحهم ولا مشاريعهم !! فبيحبطوا !! 

تنسيق طلاب مدارس المتفوقين ستيم

طب تنسيقكم بيكون إيه نظامه؟.. قالت ولية الأمر ردًا على نظام تنسيق مدارس المتفوقين ستيم: "تنسيق طالب ستيم بيكون متأخر عن تنسيق الثانوية العامة، لأنهم بينتظروا عشان يحسبوا كام طالب من ثانوية عامة دخلوا الكليات المؤهل ليها طالب ستيم ويحسبوا نسبة منهم مقابل طلبة ثانوى عام، ودي اللي اسمها (النسبة المرنة) وعلي ما بتخلص بيكون باقي يومين ثلاثة علي الكلية لا بنلحق نحجز مدن جامعية ولا بتلاقي سكن نضيف وسعره معقول.. وساعات كمان في بعض الكليات بيكونوا بدأوا الدراسة من أسبوع أو أتنين".

وأستكملت: "أولياء الأمور شايفة إن نظام تعليم مختلف، مستوي صعوبة امتحانات مختلفة، مشاريع وتفوق اولادهم وغربتهم في سن صغيرة، لازم يتحط قصاده مُعامل سموه مُعامل تفوق".
"لأن الطالب بينافس طلبة متفوقة جدًا، مش بينافس طلبة متفوقين ومتوسطي المستوي وضعاف فسهل يحقق حلمه وسطهم !!! "

طلاب مدارس المتفوقين ستيم تتطالب بمنح كاملة في الجامعات الاهلية والخاصة

- طب ايه يقعدهم في مصر، ما يسافروا يحققوا طموحهم بره.. احنا كنا بنسمع أن طلاب ستيم بيتخرجوا يسافروا بره علي طول وكل الجامعات الكبيرة بتحاول تخطفهم؟

للاسف حتي الباب ده اتقفل علي كتير من الطلبة.. المنح كتير فعلا لأن الطلبة متميزة، لكن المنح دي بتكون منح جزئية، الطالب بعد ما بيفرح أنه نجي من مقصلة النسبة المرنة بيتحسر لأن المنحة جزئية، ومهما كان الخصم بيكون صعب جدا على الأهل دفع الباقى.. فما بالك بقي مع الارتفاع المستمر لسعر الدولار!!.. بقي مستحيل خلاص يسافر للاسف! 

وقالت متعجبة: "طالب ستيم بيتفاجئ إنه بعد كل التفوق والخبرة والغربة والمهارات اللى بيكتسبها علميًا واجتماعيًا وعمليًا بيعامل معاملة طالب درجة تانية وكأنه مش مصرى، إلا لو معاه فلوس يدخل الجامعات الخاصة والاهلية وأغلبنا يا ابني مبنقدرش ندفع مصاريفها وبنستني المنح القليلة اللي بتوفرها كذا جامعة فاهمة يعني ايه طلاب ستيم ومقدرة قوتهم واللي بتروح برضو للطلبة الأعلي مجموعا وسط المتقدمين للمنحة"

"يعني الطالب اللي في الترتيب المتوسط والاخير بالرغم من أنه متفوق برضو إلا إنه لا بيلاقي له مقعد حكومي مناسب ولا حتي منحة دراسية تنقذ مستقبله!!.. الطالب الاخير عندنا بيساووا ترتيبه بالطالب اللي ترتيبه ٨٠ الف في الثانوي العام !! وده منتهي الظلم.. ازاي الطالب صاحب الترتيب ٢٠٠٠ علي متفوقين اساوويه بالطالب ال ٨٠ الف في ثانوي عام!! لو كنا سيبناه في ثانوي عام كان وصل لحلمه بسهولة لأنه اصلا شاطر !! فما بالك بالتعليم المحترم اللي اخده في مدارس ستيم ومهارات البحث العلمي، والخبرات اللي بيكتسبها من النظام !! 

تعديل القانون لزيادة عدد مقاعد طلاب ستيم 

أستكملت نفين النادي ولية أمر الطالب حديثها مطالبة بتعديل القوانين قائلة:"ستيم فرصة للنجاح فى الحياة عمومًا لأنها بتعلمه اللي بيقولوا عليه soft skills، لكن ينقصها إن الطالب يأخد حقه اللى يستحقه بتعبه وجهده فى كليات بلده !!.. بيقولوا لنا عشان نزود عدد المقاعد لازم تعديل قانون !!! طب ما يتعدل !!! ايه الصعب طالما في مصلحة البلد وأولادها !!!ونلحق ٢٠٠٠ طالب من افضل ما يكون !!! 
بينما أنهت الحديث: اللى حلمه يدخل كلية طب بيطري أو كلية علوم يدخل ستيم وهو مطمن جدًا جدًا.. أكثر من نص الدفعة بقت بتروح هناك !!