تعرف علي قصة عثمان ديمبيلي لاعب برشلونة الذي تهتف ضده جماهير النادي!
الجمعة 18/فبراير/2022 - 10:39 ص
نشر محمد علاء الناقد الرياضي قصة عثمان ديمبيلي لاعب برشلونة الذي تهتف ضده جماهير النادي وذلك في تدوينة له علي صفحته علي موقع التواصل الاجتماعي "فيسبوك".
وإليكم القصة كاملة:
في لاعب في برشلونة اسمه عثمان ديمبيلي.. الولد ده عامل ضجة كبيرة أوي في الإعلام الرياضي العالمي بقاله كام شهر، وقصته باختصار للي مش متابع، إن عقده مع النادي هينتهي الصيف ده، وعملوا معاه كل المحاولات للتجديد وفشلت، وحاولوا برضه بكل الطرق إنهم يبيعوه عشان يستفيدوا من وراه بأي حاجة، لكنه أصر يقعد ويمشي ببلاش آخر الموسم.
طبعا النادي ماعجبوش استخدام الولد لحقه القانوني ده وأذاعوا الكلام ده ع الملأ، وتحول عثمان لأكتر شخص مكروه في كتالونيا، لدرجة إنه لما بينزل في أي ماتش جماهير كامب نو بتصفر عليه وتشتمه كل ما يلمس الكورة وبيحاولوا يغتالوه معنويا بكل الوسائل.. ومش بس كده ده حتى الإعلام العالمي "المحايد" أو العادي بقى بيوصفه بالخاين والمتمرد في الأخبار عادي جدا، وكتير شايف إنه نموذج لعدم الانتماء واحترام الكيان في الرياضة.. تمام⁉️
الملفت بقى بالنسبالي إن الولد ده عشان برشلونة يجيبه أصلا ويغطي على قلم باريس في صفقة نيمار.. عمل إيه؟
خلاه يتمرد على ناديه بوروسيا دورتموند الألماني، راحوا للنادي قالولهم عايزينه رفضوا وقالولهم مش بايعين، حرضوا الشاب اللي ماكانش لسة كمل ٢٠ سنة إنه يتمرد على ناديه ومايروحش التدريبات وماينتظمش مع الفرقة، لدرجة إنهم راحوا يوم بيته لاقوه فاضي بعد لما شال كل حاجة وخد بعضه وهرب، وكانش قدام النادي في الوقت ده غير إنه يرضخ للضغوط ويبيعه ويستفيد من فلوسه.
المهم إن كل الحدوتة دي أنا بقولها لأن ساعتها محدش فتح بوقه ولا هاجم الولد ولا اعتبره متمرد أو خاين أو غير محترم لعقد ونادي وجمهور وأصحاب فضل عليه، بالعكس كله خد الموضوع من زاويته الفنية والاقتصادية بس.. طب إيه الفرق؟
الفرق إن المبادئ بتتجزأ وإن الحكم على المواقف والأشخاص مش بيكون بس نابع من التصرف والسلوك نفسه، لكن من العاطفة ناحية اللي عمله واللي اتعمل فيه، فبرشلونة مثلا نادي عالمي وجماهريته عريضة وإعلامه قوي عشان كده لما عمل سلوك ملتوي أو لاعب تلاعب عشان ينضم له عدت عادي والناس عملت مش واخدة بالها، لكن لما حصل العكس الدنيا اتقلبت.
لو بصيت للموقف ده وسحبته على أحكامك وآرائك في مواقف كتير في حياتك هتكتشف إن العاطفة غلبت العقل في حاجات كتير أوي، جايز بعضها محتاج مراجعة .
