الدكتورة سامية الحريري الحاصلة علي مكافأة ٢٩٨جنيه : الغى الكتاب الجامعى وارفع راتب عضو هيئة التدريس
الأحد 24/أكتوبر/2021 - 05:12 م
علقت الدكتورة سامية الحريري الحاصلة علي مكافأة ٢٩٨جنيهمكافـة علي اشرافها 3 سنوات علي رسالة دكتوراه وذلك في تدوينه لها علي صفحتها علي موقع التواصل الاجتماعي "فيسبوك" تضمن الآتي:
عن الترند الخاص بمكافئة الاشراف على درجة الدكتوراه..و الى اتنشر بسرعة شديدة وغريبه غير متوقعة بسبب تعليق احد اعضاء هيئة التدريس بكومنت ساخر وماعرفش مين الى نشره على جروبات فيها ملايين الاعضاء ثم تم تشييرة بنسبه عاليه جدا على صفحات كتير واصبح ترند على السوشيال ميديا وبعد ذلك نشرته قناه الجزيرة بم انه اصبح مسار جدل على السوشيال ميديا .
طبعا وجدت عديد من الاصدقاء والمعارف بيحذرونى وعدد كبير منهم بيقولى ربنا يستر عليكى وخافى على نفسك.
انا نفسى اعرف بس ايه الجرم الى انا ارتكبته عشان كل هذا الخوف والقلق عليا.
هل انا اجرمت عشان اشرفت لمدة ٣ سنوات على بحث دكتوراه وقبضت مكافاة ٢٩٨ج ؟.
انا اعلم ان قناه الجزيرة قناه لها اهداف سياسيه وبتستغل المواقف المشابهة للمواقف دى وانا لا احب هذه القناه .
ورغم ذلك انتشار الموضوع لايزعجنى لعله يصل لوزير التعليم العالى او يصل لريس الوزراء ويعلم كم المعاناه التى يعانيها دكتور الجامعة ..من رواتب متدنيه ومكافات متدنية ايضا.
حيث يتراوح راتب دكتور الجامعة المدرس ٥٥٠٠ج والاستاذ لايزيد راتبه عن ١٠٠٠٠ج والمشكله الاكبر حينما يصل لسن المعاش لايتعدى معاشه ٢٠٠٠ج او لو توفى اثناء الخدمه يشحت ابناءوه لانه معاشه بيكون اقل من ٢٠٠٠ ج.
هيجى واحدبنى آدم براس معزة يقولى مانتوا بتكسبوا من الكتب ارد عليه واقوله تخصصات كتيرة جدا عدد الطلاب فيها قليل يعنى دكاترة كتير لاتستفيد من موضوع الكتب ده .
هيجى واحد تانى براس معزة برضه يقولى انتوا بتفتحوا مكاتب ولكم اعمال خارجيه بره الجامعة اقوله برضه عدد قليل جدا من الدكاترة الى عنده الامكانيه دى وتخصصات معينه.
مصر اصبحت للاسف مناخ طارد للعلم والعلماء واساتذة كتير بيضيعوا زهرة شبابهم برة مصر يشتغلوا ويفيدوا الدول الاخرى عشان يقدروا يصرفوا على ولادهم ويعلموهم .
والنوابغ بيهاجروا مابيرجعوش يبقى لازم الدولة تاخد بالها من استاذ الجامعة لو عايزين التعليم ينصلح حاله.
الغى الكتاب الجامعى وارفع راتب عضو هيئة التدريس ووفر له حياة كريمه واعطيه بدلات كافية تساعده انه يقدر يبحث وينشر الابحاث العلميه ويحضر المؤتمرات لو بتفكروا تبقوا دوله تنافس فى البحث العلمى مع باقى الدول المتحضرة
