"نبى الله ايمحوتب".. التاريخ المسكوت عنه
الأربعاء 07/يوليو/2021 - 09:06 م
نشرت صفحة تاريخ مصر القديم، علي موقع التواصل الاجتماعي "فيسبوك"، تقريرا بعنوان "نبى الله ايمحوتب".. التاريخ المسكوت عنه.
وإليكم نص التقرير:
نبى الله ايمحوتب، او يوسف عليه السلام , منقذ مصر من المجاعة وهو اللى اتذكر على لوحة المجاعة الموجودة بجزيرة الفنتين أو الافيال فى اسوان , واللوحة دى بتحكى قصة يوسف الصديق وانه الملك زوسر خرجه من السجن وطلب استشارته وفعلا يوسف الصديق نصحه انه يخزن القمح والغلة علشان القحط اللى هيواجه مصر وفعلا زوسر سمع النصيحة وتم انقاذ مصر واحتمال وده رايي الشخصى ان صوامع الغلال كانت الهرم المدرج والمبانى اللى حواليه لان بالعقل يعنى يعنى يوسف هو ايمحوتب فيبنى هرم؟ اكيد هيبنى صومعة.
الجميل ان زوسر فى لوحة المجاعة خد لقب وهو "عز-وز" وهو اللقب للى ذكره القرآن الكريم بالعزيز فى تطابق مدهش حير علماء الاثار , اما ايمحوتب فاترقى لوزير وعلشان الملك يجمل صورته هو قدم الناس طلب من يوسف الصديق يغير اسمه فخلاه ايمحوتب وعرفه التاريخ باسم ايمحوتب الا ان لوحة جزيرة الافيال فضحته .
كمان اسم ايمحوتب فى اللغة الهيلورغيفية معناه الصادق الصدوق وده برضو يتطابق مع لقب سيدنا يوسف وهو يوسف الصديق , الأجمل من كده كمان ان السجن اللى اتسجن فيه سيدنا يوسف موجود فى البدرشين وعرفنا ده لاننا لقينا اسم ايمحوتب على الجدار الشرقى للسجن وهو اللى خلى علماء الاثار يتأكدوا ان يوسف هو ايمحوتب , كمان بنحب نذكر ان البدرشين هى اللى سماها سيدنا يوسف بنفسه لما لقى القمر طالع بدر فقال :إن البدر شين يعنى القمر بدر مكتمل ومن هنا اتسمت بالاسم ده ..
"المصدر الكتب الممنوع من النشر "الهة وفراعنة - يوسف والفرعون والميعاد المرتقب"
بشكرك انك كملت قراية لحد هنا ولكن احب اقول ان كل المكتوب فوق ده هرى وهبد انا لسه مألفه من خيالى حالا بدرجة 7 على مقياس ريختر، هبد تسبب فى زلازل فى وسط علوم المصريات , هبد من النوع الفاخر انا استوحيته من كلام مشابه قريته وزودت عليه شوية حاجات من خيالى كده , هبد يمكن ترقيته للمرحلة اللى بعد كده وتسميته عزق بضمير مرتاح مش هبد فقط , حتى اسم الكتاب مفبرك.
الكلام ده متداول على الفيس بوك بيقوله ناس سواء نيتهم سيئة او طيبة سواء الناس بتعتبرهم بيفهموا او لا فهو كلام فارغ ومؤذى للدين والعلم معا , والغرض من البوست ده ان حضرتك لا تعتبر الشخص نفسه مصدر ثقة حتى لو انا ,ولكن الفيصل النهائى هو الدليل والعلم , مش مهم مين قال ايه المهم الاثباتات القاطعة على ده ايه , اثباتات من نوع نص او نقش او بردية حاجة تشوفها بعينك او موثقات علمية من مجامع اكاديمية محترمة بتصرف فلوس على البحث العلمى.
وده طبعا بعيدا ان الكلام العبيط بتاع تلبيس القرآن الكريم برؤية الانسان الشخصة وتفصيل الايات على المزاج وهو فعلا توصيفه كده عبيط لأن اللى بيعمل كده بيفترض ان القرآن موجه له شخصيا فبيفسره على مزاجه هو ورأيه الشخصى بعيدا حتى عن مقارنات منطقية تعمل ربط حقيقى .
وانا التمس كل العذر والله للقارىء العادى لان الخزعبلات دى بيتم ترديدها بتكرار مريب بس الحق يتقال ان على الجانب الاخر التحقق من فبركة اى حاجة دلوقت بقت سهلة ، هى معادلة صعبة مطلوب من القارىء فيها انه ما يستسهلش بس.
حتى لقب باحث دلوقتى بقى اى حد بيتخذه ستار ينشر وراه اى كلام .. وهو لقب مطاط مبهم لا يحدد مجال دراسة الشخص
الموضوع بسيط جدا حتى ببحث بسيط على جوجل تقدر تتأكد على الاقل كاتب الكلام ده دراسته ايه قبل الحكم على المكتوب ومن ثم البحث عن أدلة ما يقول.
وبعتذر بجد لو البوست ضايق حد ولكنه مهم فى قلب موضوع البحث فى حضارة مصر القديمة علشان نبثت ان المصريين كانوا عظماء مش لازم نخليهم على هوانا او بمزاجنا , يكفى فقط نعرف معلومة صحيحة عنهم .
وعلى فكرة فى ناس كتيرة ممكن تاخد الجزء الاول بتاع الهبد من البوست ده وتنشره وتستشتهد بيا ويرفعونى لمصاف العلماء والخبراء لمجرد ان الكلام على الهوى واحتمال حد من مروجى الحاجات دى يسمينى اعلم هل الارض بالتاريخ المصرى زى ما عملوا قبل كده مع شخصية كانت بتكتب كلام مشابه .. وده لأن 90 % من الشعب المصرى مبيقراش اى حاجة للنهاية.
