لماذا قام الفراعنة بإنشاء وادى الملوك ؟

نشرت صفحة تاريخ مصر القديم علي موقع التواصل الاجتماعي "فيسبوك" تقريرا بعنوان  لماذا قام الفراعنة بإنشاء وادى الملوك ؟

وتضمن التقرير التالي:

- أول ملك يدفن فى وادى الملوك هو على الأرجح تحتمس الأول وفى نص للمهندس بتاعه واسمه "انينى" بيقول فيه "اشرفت على بناء مقبرة جلالاته ولا من شاف ولا من درى". 

- مع إنتشار الدفن الملكى فى وادى الملوك تطور الموضوع وإتبنى قرية عمال مهمتهم الاساسية هل العمل فى مقابر وادى الملوك والقرية دى اسمها المصرى القديم "ست ماعت" ومعناه مكان الحق وهى الى نعرفها النهاردة بإسم دير المدينة ... وكان العمل فيها بيتم بنظام الشيفتات والادوات المستخدمة فى موقع العمل عهدة رسمية فى مسؤلية كل عامل.

- مع شهرة ومعرفة الموقع زاد على اللوجستيات الخاصة بوادى الملوك دوريات حراسة من قبائل المدجاى النوبيين ودول كانوا بيتقاضوا اجور باهظة نظير عملية التأمين دى ..

- المصريين القدماء فى عام إتسمى "عام الضيع" إنسحب فيه المدجاى من الحراسة سجلوا نهب معظم مقابر وادى الملوك , وفى وقائع سرقات من عصر الدولة الحديثة ومع نهايتها ظهر لنا برديات سرقات المقابر وهى وثائق حكومية بتشرح الى حصل وسير التحقيق ونتيجته ,وده كان أوجه فى عصر الملوك رمسيس 9 و10 و11.

 ومنها نقل بعض المومياوات لمقابر معينة واعادة الدفن مرة أخرى إلا إنها كانت كلها حلول مؤقتة لأن السرقة كانت هتحصل تانى لا محالة ... وفى خلال 30 سنة كانت كل المقابر دى نهبت عن بكرة ابيها .. كذلك التاريخ بيسجل الإضراب العمالى الى حصل فى عصر رمسيس الثالث فى قرية دير المدينة واللى إترفع فيه لافتات بتقول "نحن جوعى" وتوقف العمل بوادى الملوك .

- مع بداية العصر المتأخر والاسرة 21 لما كاهن إسمه حريحور استقل بطيبة وبزغ معاه نجم الملوك الكهنة الوضع اصبح غاية فى السوء وكان القرار بإعادة دفن الملوك دول كلهم بلا مقتنيات فى بئر دفن خاص بالنبى الأول لآمون فى الكرنك وكان إسمه باى نجم الثانى وإعيد دفن اكتر من 50 موميا ملكية ومومياوات اخرى من العائلات المالكة بمقتنيات متواضعة جدا .. لدرجة إن واحد زى رمسيس الثانى لقوا الموميا بتاعته فى تابوت خشب ملامحه تشبه توت عنخ آمون ! ..الخلاصة إن فى 3 مقابر مجموعاتهم فى المتحف المصرى بالتحرير , توت عنخ آمون (كاملة) , يويا وتويا (كاملة) , ماحر برى (بردى وتوابيت وموميا ومقتنيات بسيطة ) ..ومتفرقات من المقابر الأخرى ما بين مومياوات ومقتنيات وده من موقع واحد اسمه وادى الملوك لأكثر الملوك ثراء فى العالم القديم .. أما بقية المواقع فحدث ولا حرج تم نهبها حرفيا ..

الوادى اكتشف فيه لحد دلوقتى 62 مقبرة معروف اصحابها وأكثر وتفاصيلها , مقبرة كانت على الارجح ورشة للمحنطين والتوابيت , مقبرتين غير معروف الغرض منهم تحديدا , وحفرتين دفن , كل المقابر دى اتسرقت فى العصور القديمة بلا استثناء ,, من أول انهيار عصر الدولة القديمة وبناة الاهرام بدأت السرقات بشكل موسع , مصريين سرقوا، الهكسوس سرقوا, الرومان سرقوا , العرب سرقوا .. حتى مقبرة توت اتعرضت للسرقة سابقا واتحقق فى السرقة دى واعاد غلقها الكهنة مرتين ،وكمان الرومان لاحقا حولوا بعض مقابر الوادى  لمزارات سياحية ..

فترات الفوضى والنهب فى مصر القديمة أشبه باللى حصل فى 2011 مع إستغلال بعض الغوغاء للفوضى وسرقة بعض القطع من المتحف المصرى والإغارة على بعض المواقع الاثرية وكذلك فى 30 يونيو واشهر سرقة تمت بنجاح وهى نهب وتدمير متحف ملوى فى المنيا بلا رحمة ..

والصورة لتابوت رمسيس الثانى فى المتحف المصرى من خبيئة الدير البحرى ..  واتنقل دلوقت لمتحف الحضارة.