رسالة من معلم الى وزير التربية والتعليم : انت عدمتنا العافية ..فين وعودك ..فين الـ 12 أمتحان لثالثة ثانوى
وجه العمدة عماد متولى معلم رسالة الى الدكتور طارق شوقى وزيرالتربية والتعليم قال فيها .
فين التعليم الممتع اللى وعدتنا بيه طلبة
ومعلمين وأولياء أمور ؟ احنا مش شايفين غير تعليم مفيرس بس .
وفين ال 12 امتحان لدفعة 3 ثانوى عشان يختاروا
منهم أعلى اربع درجات وأن النظام ده هايقضى على توتر الأعصاب والفرصة الواحدة اللى
كان بيعتمد عليها نظام الثانوية القديمة ؟؟؟!!!
احلف بالله إن ضميرك مستريح من ناحية دفعة
التابلت 3 ث يعنى اخدوا حقهم من الشرح والتدريب على النظام الجديد عشان يجهزوا للمدبحة
اللى هاتحصل لهم السنادى بذمتك لو ليك حد فى ثانوى هاترضهاله .
فيه مسئول عن التعليم يتباهى بأنه ماطبعش
كتب لثانوى و وفر فلوسها وسلم الاولاد تابلت ويرجع يقولهم الامتحان { اوبن بوك } هههه
وبعدين ينصح الولاد يستعينوا بكتب السنه اللى فاتت فيتسبب برفع سعر الكتب المستعملة
فى السوق ومش موجوده .
سر هاقوله لمعاليك واوعدنى تخليه بينى وبينك
ومحدش فى مصر يعرفه غيرنا !!!
دفعة التابلت اول سنه سربولهم الامتحانات كلها عالفيس
وعالواتس وتانى سنه كانت ذى الأولى بس كانوا بيجاوبوا جماعات مع بعضهم عالواتس بس المرة
دى من البيت وبالشكل ده هاتبقى فيه كارثة ومدبحة للأولاد فى 3 ثانوى السنادى ودى نتيجة طبيعية ومنطقية واللى حضرتك مش عايز تعترف
بيها لأنه هايبقى إعتراف بفشل نظام الثانوية الجديد وطبعا ده مش مسموح بيه بالأمر
.
واحب افكر معاليك أننا مع تطبيق نظام التابلت
لكن من الحضانة أو اولى ابتدائى ولحد ما الاولاد يوصلوا لمرحلة إعدادى وثانوية هانكون
قيمنا كل أخطاء النظام الجديد وعالجناها والاولاد اتعودوا عليها مش نطبقها فى مرحلة
تحديد مستقبلهم وفداهية تعبهم وأحلامهم واحلام اهاليهم .
يا معالى الوزير السنه تقريبا خلصت واقسملك
بالله لا طلبه ولا مدرسين عارفين أو فاهمين ايه اللى هيحصل ولا فيه تدريب على شكل الامتحانات
هاتبقى ازاى . يعنى الدفعة دى بالذات هانجرب فيهم النظام . يعنى هاناخدهم من الدار
للنار حرررررااااام ..
ياراجل دحنا لحد الان فات سنتين ونص من
دفعة التابلت وبدون اصدار قانون جديد للثانوية
. ومش قادر استوعب ايه سر الإستعجال فى تطبيقه بالشكل ده .
وفين حق أولادنا فى التعليم الحقيقى
( تعليم النت والمنصات فاشل ) وأسأل طلبة
6 إبتدائي و3 إعدادى مناهج عقيمة وحشو . حضرتك
قريت كتاب الدراسات ل 3. إعدادى ؟ لا أظن طب قريت منهج الساينس ل 4 إبتدائية ؟ لا أظن
وده على سبيل المثال لا الحصر .
وفين اول تصريح لدخولك الوزارة { المدرس
اللى على رأس أولوياتك } دانتا عدمتنا العافية ياراجل .
وفين العدل بين المعلمين وبين موظفو ديوان
الوزارة
ولا اقولك . . . هو فين التعليم أصلا يامعالى وزير التعليم.
