معلمة ..انقذينا يا حكومة .. كل معلم ومعلمة طالعين ملاحظة ثانوية حطين روحهم ع كفهم ..انا مش راجعة البيت وح ابات فى الشارع خايفه على امى المسنة

قالت  ناهد الهادى ،ماجستير ودكتوراه في الفلسفه اليونانيه كل معلم ومعلمه طالعين ملاحظه ثانويه عامه او تصحيح في المجمعات التعليميه طالعين وحطين روحهم ع كفهم وبيدعوا ربنا يسترها معاهم منهم الاب المسئول عن بيته ومراته ووالده ووالدته وممكن كمان اخواته ومنهم الام اللي سايبه ولادها صغيرين وبيتها وجوزها كل ده عشان في الاخر 600او 1000 جنيه ع حسب الدرجه

اضافت ناهد عبرصفحتها الشخصية على موقع التواصل الاجتماعى الفيس بوك ، انا جالي تصحيح في مجمع الاسماعيليه والله انا مش خايفه ع نفسي ولا عندي ولاد اخاف عليهم انا خايفه ع امي ست مسنه وعندها امراض مزمنه لو اتنقلها الفيرس مش هتستني ساعه بعدها وخايفه ع اخواتي وولادهم الصغيرين في البيت حد يحصله حاجه واشيل ذنبه طول العمر انا لو روحت المجمع ولقيت القاعه مليانه زي كل سنه 200 فرد او اكتر مش هرجع ع البيت ان شاء الله حتي ابات ف الشارع لتاني يوم عشان مظلمش حد ولا اشيل ذنب حد بس السؤال هنا يا تري الوزاره ممكن تحمينا وتوفرلنا قاعات زياده وتراعي المسافه المطلوبه بين كل شخص والتاني وتوفر الكمامات وتعقم المكان قبل وبعد اتمني ده من ربنا ثم من حكومتنا المحترمه ومن وزيرنا لان سقوطنا وموتنا هيضر مش هيفيد وهيكون انتحار جماعي وليس موت جماعي وربنا يسترها معانا جميعا ويحمي مصر وشعبها من كل سوء