الشباب المتقدمين للتجنيد بالقوات المسلحة "اجمع هنا يا دفعة"

تداول عدد من النشطاء علي مواقع التواصل الاجتماعي "فيس بوك" تدوينة لأحد النشطاء لتحفيز الشباب علي التجند والتعرف علي الأوضاع داخل االقوات المسلة وتضمنت التدوينة الاتي:

‏‎

الحاجات المهمة فى مركز التدريب تجيبها معاك:

1- فلوس تقريبا من 500 وانت طالع

2-غيارات داخلية

3-بودرة رجلين

4-مزيل عرق

5- 3 اربطة جزمة

6-فرش جزمة عشان خاطر البيادة ناشفة اوى

7-قفلين نحاس عشان المخلة والدولاب

8-هيسلموك فوطة هناك بس ابقى خد واحدة تانية معاك

9-مكنات حلاقة بلاستيك كتير عشان هتحلق ذقك كل يوم او يومين ولو ذقنك بتلتهب خد معاك اى كولونيا

10-ادوية الانفلونزا و مسكنات

11-معلقة

12- فرشاة اسنان لو بتسخدمها

13- ورنيش اسود

14- خرطوم صغير يجى متر هتعرف جوه هتعمل بيه ايه

15- ليفة عشان تستحمي

16- بكره خيط زيتي وابره حتي لو مش بتعرف تخيط هتلاقي زمايل ليك تظبطك

متعرفش اى حد معاك فلوس كام عشان السرقة و حافظ على مخلتك و حطها فى عينيك عشان هتسلمها بعد المدة يا حبيبى

مكدبش عليك الحياة هناك صعبة حبتين بس كل يوم هيعدى اليوم اللى بعديه اسهل عشان انت هتاخد على الوضع .......انسى البرستيج و اعرف ان ده اكتر وقت

هتعرف فيه ربنا متخفش من حد و متخليش حد من الصولات ياخد عليك ومهما بان ان اللي قدامك بيضحك ويهزر ما تجاريهوش"عاA275;قل لحد ما تتعودوا علي بعض"

الميرى مفيهوش شتيمة ليك و لاهلك فمتسمحش لحد يشتمك و ربنا يوفقك "فترة من الحياة جميلة جدا وافضل صحاب هتعرفهم هناك لانكم قايمين نايمين و متكدرين مع بعض افضل

اول يوم فى مركز التدريب

بدون تعيين يعني مفيش أكل هتاخده, هتعرف مكان الكانتين اليوم ده على طول, الميس هو محل آكل الجنود.

المهم اليوم بيبدأ ازاي: انت بتروح المكان الي هيقولولك عليه لما تسمع سلاحك, هتيجي المكان ده الصبح, هتستنى شوية, هيجي الاول ظابط, و الظابط رتبة رفيعة قدام الجنود, هيبتدي يدي محاضرة على الواقف الجيش عامل ازاي, و هيقولك ان اهم حاجة تلاتة: شرفك, مهماتك, فلوسك, و المهمات هي المخلة او شنطة الهدوم العسكرية بتاعتك.

هيخلص من الكلام, هيقولك روحو اشترو شنطة و يشاور على كانتين وراكم كده هيكون فيه مستلزمات هتحتاجها جوة مركز التدريب, بالذات المعالق و الاقفال,

في الاقفال بالذات اوعى تقرب من القفل الي لونه رمادي, لان ده القفل الصيني, القفل ده مفاتيحه بتفتح على بعضها, فخلي بالك و خليك ناصح و اشتري القفل الذهبي, او اسئل عن القفل الكمبيوتر, معروف و حلو قوي.

في عسكري هيجي يبتدي ينادي على الاسامي, و كل واحد يقول آفندم او ايوة يديله الكارنيه العسكري بتاعه, عليه تاريخ الاصدار و ينتهي في, و دي تواريخ مش كله زي بعضه, انت ممكن تكون سنة في غيرك سنتين تلاتة, المهم الكارنيه ده بتاعك و اوعى يضيع منك لحد ما يخلص جيشك, هات محفظة فيها سوستة, هتساعدك.

- بعديها بربع ساعة او نص هيجي المندوب بتاعك, هينادي على الاسامي و يقول اسمك و يقول انت هتروح مركز التدريب الفلاني

- ربع ساعة او نص ساعة كمان و هتبتدو تشكلو طابور حسب مركز التدريب و عليه هتتشكل اول طابور الزامي في جيشك علشان تركب المركبات العسكرية "اتوبيس قديم كده" مفتوح من كل حتة, تحس انه كان طيارة قبل كده و قلب اتوبيس .

- هتركب الاتوبيس, ابقى هات معاك آكل للرحلة دي, اي سوايل او عصاير, عشان الطريق ممكن يكون طويل, حسب مركز التدريب يعني.

- هتوصل مركز التدريب, هتنزل و تتشكل طابور, المندوب هيدخل و هتدخلو وراه و تبتدو تدخلو المركز و هتقعدوا على الارض تحت المظلة

- هييجي بتاع الآمن و يقولكو "الي معاه موبايل يطلعو بالزوء, الي معاه شريحة يقول, علشان الي مخبيه هنكسر الموبايل بتاعه اودام عينه"

في ناس كتير هتطلع الموبايل, انت اعمل زكي و ما تجبهوش معاك اصلا,وهات معاك ورقة اكتب فيها ارقام الناس المهمة كلها

وممكن بس الي تجيبه هو شريحة خط, و تكون شاحنه بـ 100 جنيه, عشان لما تدخل جوة هتلاقي ناس قديمة في الجيش معاها موبايلات, شوية شوية هتلاقي نفسك بتقولهم انك عايز تعمل مكالمة, فامش هتحرج لان الشريحة معاك و الرصيد معاك

- المهم عسكرية الآمن هيقولك ايه, انكو هتخشو على مكتب الامن و هيشوفوا كل حاجة معاك,و في الاخر هتطلع مفرزة الامن دي و بيفتشوك بايديهم عادي

- بعد ما يخلص تفتيش الي معاه موبايل و سلمه من الاول هيحطه في ظرف و هتستلمه لما تخلص مركز تدريب و الي طلع موبايل او شريحة و هو بيفتشك هيكسره اودامك

- هتستنو شوية بعد كده هيجيب الحلاق, الي شعره طويل هيحلق له قدامكم, بعد كده كله هيكون جاهز انه يستلم المهمات

- دلوئتي هتروح تستلم مهامتك, هتاخد المخلة و تلم حاجاتك

(3 بطاطين - ملايه - كيس مخده - 2 افرول - 2 بدلة زيتي ( للاجازه والماموريات ) واحده صيفي واخري شتوي - فانله صوف ( بلوفر زيتي ) - زنط مموه - زنط زيتي - 3 شراب - بياده - جذمه - كاب مموه - كاب زيتي - 2 فانله لياقة - شورت لياقة - كوتش لياقة - شبشب - 2 فوطه - اطقم داخلي حمالات ونص - قايش ( حزام ) - بيجامه شتوي - بيجامه صيفي

- بعد كده بتستلم سلسله و 2 قرص( معدني ).

- هتدور على عنبر فيه مكان فاضي تقعدوا فيه كلكو و الزيادة تروح عنبر تاني, كل واحد هيدخل هيشوف سرير فاضي فياخده.

هتلاقي دولاب على شمالك, تبتدي تطلع الي في الشنطة و المخلة و تبتدي ترتب لو في وقت.

لو الساعة جت 10 بالليل, مش هتلحق غير انك تتطلع البيجامة و تلبسها و القفل الذهبي بتاعك علشان تقفل المخلة و تحطها جوة الدولاب و تقفل الدولاب و تنام و ترتاح من اليوم الفظيع ده, و بكده يكون انتهى اطول يوم في العسكرية, عشان بس اول يوم.

واحذروا طبعااا من السرقات دي حاجه مهمه جدا ومتديش الامان خالص في اي موقف وتحت اي ظرف ابسط الاشياء ممكن تتسرق منك لو سيبت بس الصابونه علي الحوض ودخلت الحمام ممكن تطلع متلقيهاش فما بالك بفلوسك ولا هدومك وانت في الحمام ولا اي حاجه تسيبها علي سريرك وتخرج او تكون غاسل وناشر هدومك سايبها وتروح في اي مكان وهكذا.

اي يوم في مركز التدريب من المعتاد انه يكون كالآتي:

- تصحى الساعة 4 و نص

- الساعة 5 تروح تفطر في الميس

- الساعة 6 صفارة الاستعداد لطابور الصبح

- 6 و نص تنزل الطابور قدام مساعد السرية "الشاويش الي ماسك السرية"

- 7 تخش ارض الطابور

- صفا و انتباه و تعليمات اثناء الطابور

- كل المخالفات في اليوم الي قبله يتنووه عليها في طابور الصبح

- هيجي عسكري كل يوم يقول المعنوي, آية, حديث نبوي, و خبر من جريدة القوات المسلحة آخر عدد

- بيطلع شاويش وراه الاوامر و الاوامر هي اسم القائد منوب و الظباط النبطشيات

- بعد ما يخلصو هتقول حاجة اسمها نشيد الجيش, مع الايام هتحفظوه" رسمنا علي القلب وجه الوطن "

- بعد كده هتبتدي تجهز التشكيلات عشان تبتدي تمارين اللياقة, هتجروا حوالين ارض الطابور, تعملوا شوية تمارين و بخ على الساعة 9, هتروح العنبر تريح شوية

- الساعة 9 و نص تنزل للطابور التاني و هو طابور التعليم الاولي, او اسمه طابور الكفار , الطابور ده بيقعد 4 ساعات في الشمس, يعني فيه وقفة كتير و صفا و انتباه و الحدث الي فيه ان الشاويش بتاعك هيجي يعلمكو شوية حاجات عسكرية, مرة ازاي تفك السلاح وتركبه, مرة يقولك ازاي تمشي الخطوة العسكرية, يعني طابور تعليم اولي بيبقى كده كل مرة.

- تيجي الساعة 2, تبتدي تجهز التشكيلات علشان يدور الطابور على الميس للغداء

- تخلص الغداء تروح العنبر تموت شوية من التعب على السرير كده

- الساعة 4 و نص تنزل طابور الهتاف, يجمعكو الشاويش

- الساعة 5 تخش ارض الطابور, الطابور ده ابسط طابور, هتقف لحد الساعة 5 و نص او 6 بالكتير, صفا و انتباه و شوية تعليمات بعد كده تحيو العلم و تمشو.

- الساعة 7 العشاء.

- بعد العشا لحد الساعة 10 هتقعد فاضي, في ناس بتنام, في ناس بتقرا حاجة, في ناس بتقعد تلعب مع بعضها, ناس تانية يطلعو السجاير و يدخنو و يتكلمو ف اي حاجة, يعني الحياة بتبقى حلوة بعد الساعة 6, بعد اسبوع هتبتدي تحفظ اسماء صحابك الجداد.

- الساعة 10 النور يطفي, لازم راسك تكون على المخدة, و تنام عشان تصحى ليوم جديد.

الكلام الموجود هنا يمثل 95% من الواقع اللي هتشوفوه والباقي فروق بين مراكز التدريب بس مش فروق كبيرة فرق اسلوب