اسمع حدوتة بلابيعو!!!
الجمعة 17/أبريل/2015 - 08:52 م
اسمع حدوتة بلابيعو!!!
1
إنت يا ريس ياللي هناك
و إنتي يا طلة من الشبــّاك
و انت يا قاعد جوا القهوة
و قاعد تسمعلي في أهواك
@@@
2
اسمعوا حدوتة بلابيعو
قصة بمعنى لعيل سيس
فاقد تربية و تأسيس
راشق في صحابه دبابيس
و السر ف لحظات بيذيعو
اسمعوا حدوتة بلابيعو
@@
3
عيــّـــل ضيـــّـــع كل فلوسه
على هند وبخاطرها و سوسو
و عشانهم فرّط في دروسه
و أهو ضاع من قلة مجاميعو
اسمعوا حدوتة بلابيعو
@@
4
صحبة سوء وعرفها الواد
غرقانة ف بوظان و فساد
بودرة و خمرا و ليلته الحمرا
وسط ترامادوله و بلابيعو
اسمعوا حدوتة بلابيعو
@@@
5
طرطق ودنك ياللي معايا
التربية مش بس مرتب
أو تصرف و تقول يا ضنايا
أو يمرض جيبك يتشطب
وتعيـــّط و تسلـــّم راية
شوف أولادك حن و طبطب
و اسأل نفسك ليه بيضيعوا
اسمعوا حدوتة بلابيعو
@@
6
شد على ابنك بس تصاحبه
طاطي لسنـّه و انصت ليهْ
اسأل عنه و تابع واجبه
شوف الدنيا من حواليهْ
عادي راقبه شوف ايه عاجبه
وحاول تتعلم تقاليعو
اسمعوا حدوتة بلابيعو
@@
7
وقت زمان غير وقت الآن
نت وفتنة و أفلام هابطة
وعالم مبهر بالألوان
شد الحبل و رخــّي الربطة
خليــّك رمانة الميزان
ساعته على أوقاتك ظابطة
و لو شتــّى تبقى إنت ربيعه
اسمعوا حدوتة بلابيعو
@@@
8
قــُصر كلامي بعيد و بقول
دورك مش مادي وخلاص
مش حايموت لو أدمن فول
دورك تسمع و بإخلاص
علــّمه ازاي يلقى حلول
واغرس حب الدين جواه
طاعة و زكا و صيام وصلاه
يكبر يدعوا لبيت ربــّاه
و يقولوا عليه دا بن أصول
فبلاش إنت لناره تبيعُه
و يعيش نفس مصير بلابيعو
اسمعوا حدوتة بلابيعو
@@@@@@@
