"كلب الهرم"يشعل مواقع التواصل الإجتماعي.. "البلد بقي كلها دواعش"

آثارت واقعة ذبح كلب على يد بعض الأشخاص بطريقة وحشية، غضب الكثير من المواطنين ونشطاء موقعي التواصل الإجتماعي"فيس بوك وتويتر"، وأصبحت قضية تعذيب الكلب المحور الأول لنشطاء الفيس بوك.

وأرجع النشطاء هذه الواقعة إلي نسبة العنف التي تواجدت في المجتمع الفترة الآخيرة، بعد ظهور"داعش" وقتل الأقباط المصريين في ليبيا.

أنشأ المغردون وسماً حول الواقعة عبروا فيه عن استيائهم، وقد ضجّ به موقع تويتر، ليقوم نشطاء آخرون بانتقاد تناول الموضوع بهذا القدر من الأهمية وتجاهل مواضيع أخرى ذات أهمية أكبر.

وقال أحد المغردين، :"وللكلاب حظوظ... اهو ده المقتول الوحيد اللي هيجي حقه."، وعلق آخر:" للاسف الواحد في مصر مش عارف يحزن على ايه و لا ايه. الاخلاق انعدمت".

وروي محمد السيد صاحب "كلب الهرم"، :"انا نزلت مرة الشارع وكان معايا الكلب، وهو مش مترخص بس أنا مربية تربية عالية، مش هيأذي حد، وفي اليوم دا جري ورا قطة في الشارع، لقيت واحد بيقولي حوش الكلب بتاعك، فقولتله هو مش هيعمل حاجة، فحصلت مشاجرة بيننا، الكلب لما شاف الراجل بيضربني جه وهجم عليه، بس أنا شيلته عنه ومضرهوش".

وأضاف: «الشخص اللي اتخانق معايا، اتصل بناس تبعه وفجأة لقيت نحو 40 واحد معاهم سلاح أبيض وجايين يتخانقوا معايا، وأنا لوحدي فسبت الكلب يجري وراهم، وبالفعل جريوا من قدامه، وناديت عليه رجعلي تاني، وأول ما رجع الناس هجمت عليا فهو دافع عني وعض 8 منهم".

وتابع، "فوجئت تاني يوم إن الشخص دا وأصحابه قدموا بلاغ ضدي، وفضلت 4 شهور برا البيت عشان خايف البوليس يقبض عليا، وبعدها عملنا قعدة عرفية وصالحت الراجل بس الناس اللي معاه اشترطوا عليا إني أسلم لهم الكلب عشان يقتلوه، مقابل إنهم يتنازلوا عن المحضر، حاولت إرضائهم بأي حاجة تانية رفضوا".

وقال محمد باكيا، "أنا مقدرتش أسلم لهم الكلب، واديته لواحد صاحبي سلمه للأهالي، وشفت اللي عملوه مع الكلب بعنيا ومقدرتش أعمله حاجة، مع أنه كان وفيا لي، كل ضربة نزلت عليه وجعتني أنا".

وألقت قوات الأمن القبض علي المتهمين بتعذيب وذبح الكلب، ومنهم جزار وعاطل من منطقة شبرا رخيمة.