كمال ..طز فيكي يا بلد..روح الدكتورهاني صعدت لربها تشكو ظلم المسئولين
الجمعة 14/مارس/2014 - 04:16 م
قال الدكتور محمد كمال عضو هئية التدريس بجامعة بني سويف ..طز فيكي يا بلد ..طز في دكاترة الجامعة..طز في كل المسئولين
اضاف الدكتور كمال عبر صفحته الشخصية علي موقع التواصل الاجتماعي " الفيسبوك " من أيام كتبت أطالب بتدخل الدولة لعلاج الزميل دهاني كمال الاستاذ المساعد بزراعة المنوفية.
وبالأمس كرم الرئيس الفنانين والرقاصين والطبالين في الوقت اللى كانت روح الزميل هاني بتصعد الي ربها تشكو إليه ظلم البشر وإهمال المسئولين وهواننا على الناس.
هاني ارتاح من المرض والعذاب ومن البلد واللى فيها ومننا لاننا مقدرناش نتحد عشان نطالب بحقه وبحقنا في العلاج
تسائل يا تري ولاده هيعانوا بسبب ضعفنا وتفتتنا وياللا نفسي وعدم مطالبتنا بالمعاشات ؟
فيه كام هاني بيننا وكام واحد مننا مات بسبب الاهمال وعدم العلاج وولاده اتبهدلوا من بعده ؟
مش عارفين ؟ اجيب لكم قصة زميلنا في حلوان اللى اتبهدل سنتين بين المستشفيات الحكومية وفي الاخر مات لان الدولة رفضت علاجه في الخارج ؟ اجيب لكم قصة زميلتنا اللى لسة عايشة متبهدلة في القصر العيني من شهور ومن حلاوة المسئولين كانوا عايزين يخصموا منها بدل الجامعة عشان بتتحجز في المستشفي ؟ وعشرات غيرهم؟ اجيب لكم قصص ولاد زمايلنا اللى ماتوا ومش عارفين يدفعوا فلوس المدرسة وبيبيعوا كتب اباهاتهم بالكيلو عشان محتاجين واللي مش عارفين نعمل لهم اي حاجة ؟
عيشة ضنك وحياة مش عايشينها مطحونين شغل في الكلية وفي البيت في الزفت الابحاث وعشان ايه في الاخر ؟ عشان مرتب اقل من عامل في اماكن كتيرة ؟ عشان علاج مش بنشوفه ؟ عشان ولادنا يتبهدلوا بعد ما نموت وياخدوا معاش ملاليم ميكفيش عيش حاف ؟
اشار د كمال فيه كام واحد منكم فعلا بيدور على حقوقه وحقوق اولاده ؟ وكام واحد بيتهرب لمليون سبب وسبب؟
الله يرحمك يا هاني ويدخلك فسيح جناته ويرحم ولادك ويكونوا خير خلف لخير سلف.
ادعوا له بالرحمة ولوالدي ولكل اموات المسلمين ولأحيائهم
