طارق شوقي.. "وزير مثقف وچنتل مان كدة فى نفسه" لهذه الاسباب
الأحد 21/يناير/2018 - 10:48 ص
نشر بعض أولياء الامور على مواقع التواصل الاجتماعي "فيس بوك"، مقارنات بين وزراء التربية والتعليم والدكتور طارق شوقي، وزير التربية والتعليم الحالى.
وقالت احدى أولياء الامور، على جروب "تمرد على المناهج التعليمية": "كل الوزراء اللى فاتوا من ايامنا احنا لحد ايام الهلالى كنا احنا وولادنا بالنسبالهم حقل تجارب مش اكتر وكل واحد عايز يسيب بصمة وخلاص واستوينا فى انظمة واختراعات ملهاش حصر وكلها فشلت وكانت بصمة ووصمة عار فى تاريخ كل حد فيهم"
واضافت: "لحد ما جالنا د.طارق شوقى
وزير مثقف وچنتل مان كدة فى نفسه ولابس بدلة وكراڤات آخر شياكة
اتعلم احسن تعليم ولف العالم كله راجل واااااو فى مجال الاتصالات والتكنولوچيا فكل همه يطور التعليم بمجال دراسته وعمله لان هى دى الحاجة الوحيدة اللى يعرفها".
وتابعت: لكن للاسف هو راجل مش تربوى ولا يدرك اى شىء عن التربية والتعليم ولا عن تفاصيل المطبخ اللى دخله فجأة فكل اللى عايز يعمله انه يفور المطبخ ويعمله على احدث طراز زى باقى مطابخ العالم
هو لف العالم اه لكن للاسف ولا لف على مدارسنا ولا شاف اللى شوفناه لانه بكل بساطة ولا هو ولا اولاده ولا احفاده ولا اسرته باكملها زى ولادنا ولا اتعلموا تعليمنا ولا راحوا مدارسنا ولا اطحنوا فى مناهجنا ولا شافوا المرااار اللى بنشوفه
تفتكروا هيحس بينا !!!!
اكيد الاجابة لأ والف لأ
لان قولنا مرارا وتكرارا فيه فرق كبير بين حد يسمعك وحد يحس بيك
وبالتالى الراجل جاى عايز يأكلنا آيس كريم بس بالعيش
ووجهت رسالة:" ومن موقعى هذا احب اوجه ليه رسالة واقوله حضرتك هتفشل زى اللى قبلك بالظبط وهتسيب وصمة عااااار كبييييرة اكبر من أى حد المطبخ محتاج ترميم ومحتاج امكانيات ومحتاج ناس تحت إيدك يكونوا عندهم ضمير ويقولولك بكل صراحة ايه هى العيوب بدل كلمة كله تمام يا فندم اللى موديانا كلنا ورا الشمس
وقبل كل ده مطبخك محتاج يتأسس صح عشان تقدر تفوره بعد كدة براحتك وتجيبله الاجهزة الحديثة والبيلت إن بقى ويبقى هو كمان واااو زيك لانك مهما كلفت فالاساس بايظ يا بيييه"
#لا_للثانوية_العامة_الجديدة
#اولادنا_خط_احمر.
