كابوس تطوير التعليم علي السرير!!

التطوير والجودة في التعليم :

صحي المسئول من النوم وبحث سريعا عن قلمه وإذ فجأة .. قرر إلغاء سنة سادسة والابتدائية ٥ سنين ..

ثم حلم بكابوس مزعج وانتفض من السرير وقرر يرجع سنة سادسة لتعود الابتدائية ٦ سنين ..

ثم جاء مسئول آخر وبعد وجبة دسمة نام وصحي فقرر إعتبار سادسة سنة نقل عادية من غير شهادة .

متفهمش سنة سادسة دي عاملة لهم أية بالظبط..!!

واستمرت الأحلام المزعجة وتحولت لأحلام اليقظة  فاكتشف أهمية مادة الحاسب الآلي في تطوير وتقدم الشعوب فقرر .. إلغاءها من المجموع .....

إعمل ميد ترم .. إلغي الميد ترم

تربية فنية في المجموع .. لأ إلغيها من المجموع ليستمر الذوق العام في تدهور .

تربية رياضية نشاط  .. لا دخلها في المجموع من غير ما تعيد تنشيط مدرسين المادة بعد ما اتعودوا على الراحة

افتح مدارس تجريبي وتجريبي مميز .. لا غير اسم تجريبي وخليها مدارس رسمية ورسمية مميزة ..

٢٢طالب في التجريبي المميز  .. لا ارفع وخليه ٤٥ طالب

إعمل مدارس ياباني ... ياباني في غير ملكك ...

ثانوية عامة .... لا لا ..دي محتاجة مقالات كتيييييىر لوحدها

بس يا سيدي ... وكل ماسبق هي رؤيتهم لضمان جودة التعليم ..

لا لا استنى..  دة احنا عندنا كمان مدارس بيقولوا انها معتمدة من الهيئة القومية لضمان الجودة.

 انت مش عارف ان دستورنا بينص على ضرورة تحقيق جودة عالمية في التعليم.. ماهي دي آخر رؤيتهم في الجودة .. معندهمش حاجة تاني.. وقد تكون رؤية البنك الدولي .

والسؤال الآن.. متي سيتم إعادة هيكلة وزارتي التعليم ..؟ وتحويل كل من تسبب في تدهورهم للتحقيق بتهمة إفساد وتدهور التعليم بمصر عن عمد ؟