استاذ الجامعة ماشي بـ "الستر" ..يارب سامحني
النقاط العشرين في حياة دكاترة الجامعة المصريين: مين هو دكتور الجامعة
1- انسان كان نصيبه انه يفتكر ان وظيفة
دكتور جامعة دي هي حلم حياته واجتهد وطلع عينه وهو طالب عشان يبقي الاول ويتعين في
الجامعة
2- عشان يبقي الاول في الجامعة معرفش اصلا
يعني ايه الجامعة وهو طالب يعني لا فسح ولا خروج ولا شلل ولا الجو اياه ولو اتفرج علي
ماتش كورة يبقي كدة مهرج وضيع وقت ويسهر يعوضه
3- لما ربنا كرمه واتعين معيد فوجئ ان اللي
فات حمادة واللي جاي حمادة تاني خااااااااااااااالص
4- بدا التمهيدي وبعده الماجستير وعليه
سيوف ما يعلم بيها الا ربنا من اول الموضوع والمشرف وشراء المراجع والكتب والسهر والمذاكرة
من تاني ولو كلية عملية عنده تكاليف العينات والمعمل الخ الخ
5- في الوقت اللي زمايله اللي اقل منه بكتير
في الكلية ربنا كرمهم بوظائف تانية احسن منه ماديا بأضعاف ومفيش عليهم اي اعباء هو
بيفكر ازاي يقول لابوه وهو زي الشحط هات خمسين جنيه سلف عشان مش معايا فلوس المواصلات
بس علي فكرة امه كانت فرحانة جدا بابنها الدكتور رايح ابني الدكتور جاي وعلي ما يخلص
الماجستير يلاقي نفسه مديون بمبلغ وقدره
6- خلص الماجستير وقبل ما يفرح ويريح قالوا
له الحق خلص الدكتوراة والا هتتحول اداري جري يلف في نفس الدوامة مرة تانية عشان يلحق
يخلص الدكتوراة وعشان نفس اللي حصل في الماجستير وكأنه بيشوف فيلم للمرة التانية وبردو
لسة بيستلف من ابوه الخمسين جنيه اياهم وامه لسة فرحانة بابنها الدكتور راح ابنها الدكتور
جاي
7- لو راجل بينتبه فجأة انه لازم يتجوز
عشان يلحق يخلف عيلين يربيهم ولو انثي بتكتشف فجأة ان كم العرسان اللي رفضتهم عشان
بتحضر الماجستير ثم الدكتوراة ضاعوا عليها وان زميلاتها اللي ربنا كرمهم ومدخلوش سكة
الجامعة اتجوزوا وخلفوا وبينزلوا صورهم مع عيالهم علي الفيس
8- مش هقولك بقي بيعمل ايه عشان يتجوز من
شقة وعفش الخ الخ صحيح كل الناس عندها المشكلة دي لكنها عنده بزيادة لانه كل ما يروح
لواحدة بيعاملوه علي انه دكتور جامعة ولازم يدفع ولو انسة كل ما بيجي لها واحد فاكر
ان تحت القبة شيخ وعادة مستني هي اللي تصرف علي البيت وتحمد ربنا انه اتجوزها ما هو
اتجوزها بعد ما خلصت الدكتوراة متنسوش
9- قبل ما ننسي طبعا ممكن يبقي ساكن في
محافظة وكليته في محافظة تانية ورايح جاي لما حفظ المطبات في الطريق وعرف ان الطريق
الزراعي من الجيزة لبني سويف عبارة عن 144 مطب وان قطر 7 الا عشرة المكيف الطلبة والموظفين
والعمال بيركبوه من الواسطي ومش بيدفعوا تذاكر وبيبقي ولا قطر الدرجة التالتة
10- يتجوز ويخلف ويفضل يدرس بردو ويذاكر
ويشتري كتب عشان يعمل ابحاث ويترقي وبعد كدة يا عالم يمكن دمه يطلع تقيل علي حد في
اللجنة او حد يوصي عليه فتكون النتيجة انه يسقط وممكن يسقط مرة واتنين وتلاتة عادي
مفيش مشكلة الورق ورقنا واللجان لجاننا وممكن ينشر بحث دولي في مجلة عالمية لها امباكت
فاكتور محترم مفيش حد من اللجنة نشر فيها وبردو يسقطوه عادي
11- امه لسة فرحانة بردو بابنها الدكتور
راح ابنها الدكتور رجع وهو كل شوية يجي له وزير اللي يقوله هفصلك واللي يقوله مش هرقيكم
واللي يقول عايزين عسكري يمشي وراهم وحاجة مرار
12- ولاده دخلوا المدرسة ودماغه بتلف خاص
ولا حكومي وفي الاخر ترسي علي تجريبي لانه مش معاه فلوس الخاص اللي العمال في جهات
كتير في الدولة بيدخلوا ولادهم فيها لان مرتبهم اضعاف مرتبه
13- لو راح اي مكان واتعرف انه دكتور جامعة
بقدرة قادر الاسعار تتضاعف عليه ما هو دكتور جامعة يدفع بقي
14- مش هقولك بقي عن الدوخة ولفة الدماغ
كل شهر وهو بيحسب الايجار والمواصلات ومصاريف الاكل والشرب ودروس العيال واللبس ولو
لا قدر الله علاج وادوية وكشف دكاترة ويبص للمرتب من هنا ويعيط من هنا
15- لو ربنا كرمه في ترقية الاستاذ مساعد
يفضل كمان 5 سنين في نفس الدوامة شراء كتب ومذاكرة وتجارب وعينات لو عملي و 5 ابحاث
تتنشر وكل ده يكلفه الاف من لحم الحي وعلي حساب عياله وفي الاخر بردو يمر بنفس دوامة
الترقية لاستاذ مساعد
16- في وسط الجو ده احيانا بيشوف ولاده
وممكن يقضي معاهم دقايق وبيبقي سعيد اوي انه يكتشف ان ولاده حلوين ودمهم خفيف وان الست
اللي اتجوزها من سنين طويلة شكلها اتغير والمفاجأة انه هو كمان شكله اتغير ويا سلام
لما يبقي فاكر البنت في اولي ابتدائي وتطلع في تالتة
17- لو دكتور الجامعة سيدة بتعمل كل ده
وجنبه عندها عمل الاكل والغسيل وتجهيز العيال للمدرسة ومراجعة الدروس معاهم وبتشد شعرها
عليهم زي اي ست مصرية اصيلة
18- وسط كل اللي فات ده هو عنده محاضرات
لازم يشتغلها بما يرضي الله وتصحيح اوراق ما يعلم بيه الا ربنا في الامتحانات ولازم
بردو يراعي ربنا عشان ده مستقبل طلبة واجتماعات وندوات ومؤتمرات وووووووووووو
19- لو تعب مفيش علاج او العلاج جزئي رغم
انه بيتخضم منه كل شهر فلوس العلاج ومفيش عنده نادي يقعد فيه قعدة محترمة رغم انه بيتخصم
منه اشتراك النادي ولما بيسافر لشغله بيدفع التذاكر زي اي حد مش بياخدها ببلاش زي جهات
تانية رغم انهم بيسافروا زيه بردو لشغلهم وعلي الكرسي اللي جنبه بس هم جهات عليا وهو
بيكتشف انه جهات تيت تيت تيت
20- بعد سنين طويلة يكتشف انه وصل سن المعاش
وولاده كبروا بيتفرج عليهم احيانا ومعاشه اصبح ملاليم ويا اما يفضل يروح الجامعة يا
اما يقبض الملاليم اللي مش بتكفي علاجه ولو مات في الطريق الطويل ده ولاده بيقبضوا
الملاليم وبيتشردوا من بعده
ملحوظة: والله ما كل الكليات فيها كتب ولا لهم دخل تاني غير الجامعة فالرحمة شوية مش كل ما يمسك الوزارة مهندس ولا طبيب تفتكروا الناس كلها زيهم ودكتور الجامعة اللي بتشوفوه في مسلسلات نبيلة عبيد وفيفي عبده وعادل امام اللي عنده فيلا وشاليه والله ما حقيقي كلنا ماشيين بستر ربنا واستغفر الله لي ولكم ولليوم الاسود اللي دخلت فيه كادر الجامعة رغم اني بردو فخور اني استاذ جامعي
