الخلايا النائمة.. ومطالب المعلمين المادية.. هل تتحرك الدولة من جديد ؟

قبل أن أتحدث فى اى شىء اقول شكرا للدولة.. شكرا لأنها فى أصعب الظروف المادية تمت قرارات زيادات الحد الأدنى للأجور.. لكن هناك أمور أخرى يجب النظر إليها بدقة وبتركيز. طالما هناك انفراجة او بوادر انفراجه. لأن الخلايا النائمه بتتكلم فى امور محتاجة فعلا نظرة اضافية من الدولة.. حاليا الاقتصاد يتحسن والمؤشرات تتحسن وازمة العملة بدأت فى التلاشى وفعلا  زى م القائد قال  " أزمة الدولار ح تبقى تاريخ ". 

لكن ماذا عن المعلمين الحصن الأول للدولة والقوى العاملة الأكبر فى العدد بالجهاز الادارى للدولة. هل سنرى تحرك جديد من الدولة فى الأمور التى سنقوم بسردها فى النقاط التالية: 

١- مكافأة الامتحانات الـ ٢٠٠ يوم من سنة ٢٠١٤ كما هى لم يتغير فيها جديد شوفوا التضخم كام من سنة ٢٠١٤ ومع ذلك مكافأة الامتحانات لم يتغير فيها جديد نهائيا. والمشكلة الحقيقية انها تمثل استمرارا لذكرى خرافة اساسى ٢٠١٤.. ويقولوا لينا من سنة ٢٠١٤ مكافأة الامتحانات كانت تعادل مرتب شهرين. دلوقت لا تصل إلى نصف مرتب شهر لبعض فئات المعلمين. وتيجى الناس السلبية تقولك ١٠ سنين المكافأة زى م هى وكمان قيمتها بقيت مش جايبه حاجة.. طب نرد نقول ايه.. دا كمان هناك امر يثير استغراب المعلمين.. هو ليه بيرحلوا صرف مكافاة الامتحانات ال ٢٠٠ يوم الى الميزانية الجديدة طالما هى محتسبة ضمن الحد الادنى للأجور للمرتبات الشهرية. لذا يجب الالتفات لذلك الامر رغم اقرار مكافأة امتحانات شهرية فى الأعوام الأخيرة.  هل سنرى تدخل جديد من الدولة ؟

٢- الدولة قررت زيادة بدل المعلم مع مرتبات مارس ودا أمر محترم جدا جدا.. لكن المشرع عند اقرار زيادة بدل المعلم لم يتذكر  ان هناك زيادة أخرى يجب اقرارها فى كادر المعلمين وهى زيادة قيمة بدل الاعتماد.. زيادة بدل المعلم وعدم زيادة بدل الاعتماد ترك المعلمين للقيل والقال. وبصراحة أخشى تأثرهم. لأن الزيادة فى بدل المعلم دايما يقابلها زيادة فى بدل الاعتماد.. ما عدا هذه المرة.. لذا اتمنى من الدولة تدارك الأمر.

٣- تعريفة بدل المبيت يتم احتسابها بحوالي ٦ جنية عن الليلة منذ ٤٠ عام تقريبا. هل فيه حاجة دلوقت بال ٦ جنية. نتمنى النظرة إلى تعريفة بدل السفر والمبيت لأنها قديمة جدا منذ الثمانينات.

٤- ورقة التصحيح فى الشهادة الاعدادية يتم احتسابها ب واحد جنيه. حتى لما د.رضا حجازى أقر زيادة لها منذ عامين حدث اعتراض من المالية ولم يتم الموافقة على ذلك وفى النهاية تقولوا المعلمين رافضين ليه التصحيح ؟؟ تصحيح الاعدادية وملاحظة الاعدادية محتاجين تحفيز مادى عاجل لزيادة الإقبال.
طب الناس ليه بتعتذر او بتحاول تعتذر.. التخفيز المادى يزيد الإقبال على العمل فى الشهادة الاعدادية سواء ملاحظة او تصحيح.

٥- الشهادة الثانوية العامة محتاجة تحفيز مادى للمعلمين.. مش معقول نروح ملاحظة علشان ناخد مكافأة ٤٥ جنيها يوميا بعد الاستقطاعات تصل إلى ٤٠ جنيها يوميا بتروح ف الاكل والشرب. أعمال الامتحانات أصبحت عبء مادى على المعلم والمكافاة ثابتة والاسعار بتتحرك.

٦- صيانة المدارس يجب أن تكون فى الاجازة الصيفية وليس أثناء الدراسة. هو ليه الصيانه فى ايام المدارس.

٧ - التدريبات فى الصيف فقط للمعلمين وليس أثناء الدراسة.

٨ - يجب اختصار مدة اجراءات التعاقد مع المعلمين المساعدين الجدد لأن المدارس محتاجة اليهم واطالة مدة الاجراءات ح يفتح باب القيل والقال والكلام كتير من المغرضين أصحاب نوايا الاحباط.. اتمنى قبول الرؤية.

٩ - المدارس بتقول م يوفروا عجز المعلمين ويلغوا اداراة المتابعة وتقويم الاداء بالادارات والمديريات ويكون الموجه أثناء زيارته للمدرسة متابع ادارى وفنى.