افكار اقتصادية.. قابلة للتنفيذ

مصر بلدنا جميعا وكلنا لازم نفكر وكلنا لازم نبقى معاها.. مفيش حاجة عندنا اسمها " وانا مالى " او " خليك جنب الحيط " طالما بتحب الصالح العام وبتخاف عليه ح تتسمع ولو فكرك حلو ح يتقبل. احنا فى الدولة الجديدة وفى عهد احترام الفكر..  

بند بدل معلم من اقتراحاتنا 

أفكارنا من هنا بتتطبق ولينا مثال فى مقال ٨ نوفمبر اللى اتطبقت الجزئية الثالثة منه فى قرارات زيادة المرتبات وتم زيادة مبالغ مالية فى بند بدل معلم.. لكن أفكارنا اليوم ح تكون افكار لصالح الدولة وح تتقابل بسعة صدر  لأننا بنتكلم من أجل مصر ام الدنيا. فماذا نقول فى أفكارنا:-

صناديق الجزاءات

١- ضرورة تحويل جميع المبالغ الموجودة فى صناديق الجزاءات إلى ميزانية الدولة فورا لأنها أموال يتم تحصيلها من جزاءات الموظفين. أموال صناديق الحزاءات لائحتها ضعيفة بيعملوا بيها قروض حسنه للموظفين ومعسكرات وما يستلزم مشتريات بعض المناسبات.. الدولة أولى من كل ذلك ويجب اعتبار الجزاءات إيرادات دولة وتحويل كل أموال الجزاءات وصناديق الجزاءات إلى الموازنة العامة لتقليص جزء من العجز بالموازنة.

استرداد للكتب الدراسية من الطلاب

٢- فى التربية والتعليم ليه م نعملش استرداد للكتب الدراسية من الطلاب فى نهاية العام ونبيعها لشركات صناعة الورق وذلك لتقليل نفقات طباعة الكتب. هو ايه فايدة احتفاظ الطلاب بالكتب بعد اداء الامتحانات.. هل المسؤولين عارفين الطلبة بتبيع الكتب لمين بعد نهاية العام ؟ طب استردوها من الطلبة بالقانون واعيدوا بيعها لشركات الورق لتقليص دعم الدولة للكتاب المدرسى ونفقات طباعته.

شركة مصر للاستثمار الزراعى بالدلتا الجديد

٣- ايه المشكلة لما اعمل شركة مصر للاستثمار الزراعى بالدلتا الجديد وتكون شركة مساهمة مصرية تابعة لصندوق مصر السيادى بمساحة مليون فدان.. ( ابيع منهم ٤٩٠ الف فدان بالبورصة والفدان بسعر لا يقل عن مليون جنيه ) يبقى الشركة معايا والقرار ملكى والمساهمين جابوا ليا إيرادات ب ٥٠٠ مليار جنيه. مع التحصيل بالدولار للاجانب مع البيع لمستثمرين خليجيين لضمان ضغطهم معانا على إثيوبيا فى شأن المياه.. الخطوة دى بالذات إنقاذ كبير للاقتصاد المصرى للسيطرة على السيولة الموجودة بالأسواق وامتصاصها فى الاستثمار وممكن يقلل الضغط على رفع سعر الفائدة بالبنوك.

تشجيع الاستثمار الخاص بالتعليم

٤- تشجيع الاستثمار الخاص بالتعليم لمزيد. من توسعات القطاع الخاص فى انشاء فصول جديدة بالمدارس الخاصة او فتح مدارس خاصة جديدة. لتقليل الضغط على الاستثمارات العامة للحكومة.

بيع الأصول او تأجيرها لجذب العملة فقط

٥- بيع الأصول او تأجيرها لجذب العملة فقط بمعنى هم يشتروا الشركات بالعملة الصعبة منى وانا اخد العملة الصعبة اقضى بيها مصلحتى واستبدلها بالجنيه المصرى لإنشاء كيان بديل للشركات المباعة علشان محدش أجنبى يتحكم فى الاقتصاد. ويشرب هو الشركة بتاعته لو فكر يتعبني.

انشاء شبكة المحمول الخامسة

٦- لماذا يتأخر قرار انشاء شبكة المحمول الخامسة اللى ممكن تجيب لميزانية الدولة على الأقل أربعة مليار دولار ( تكلفة الرخصة + الاستثمارات )

عودة الدولة إلى صناعة الحديد والأسمنت

٧ - لا بد من عودة الدولة بقوة إلى صناعة الحديد والأسمنت.. ليه الفكرة دى ؟ المستثمر الاجنبى جاى يستثمر ف جزء كبير من العملة الصعبة مش بتروح للدولة بل تذهب لجيوب أصحاب مصانع الحديد والأسمنت وبالتالي الدولة لن تستفيد تماما من الاستثمار.. لذا يجب التفكير فى ذلك الأمر بقوة.