لو أنا المسؤول... كيف نكسب قلوب المعلمين؟
المعلمون هم اكبر قوة بشرية فى دولاب العمل الحكومى ودايما هم السند الأول للدولة. لو انا رايح مشوار هم سندى ولو انا ورايا مسؤولية هم المدد والعون. احنا عايزين نكسب قلوبهم وننعشهم قبل بدء الدراسة للعام 23/24. ازاى نسعدهم ؟ ازاى نحضنهم ؟ ازاى نلاقيهم وقت الحاجة اليهم ؟ انا تخيلت انى انا مسؤول وعايز اعمل شوية قرارات تزيد من نسبة الرضا لدى المعلمين وتعيد اليهم البهجة والسعادة. فقررت أتخيل قرارات أكون بيها الأول حبا والأعلى رصيدا والرغبة والخيار الأول فى قلوبهم وقلوب اسرهم وعائلاتهم ومحبيهم..
ايه القرارات اللى ممكن أقوم بيها لتحقيق سعادة المعلمين:-
1- سأقوم بإصدار قرار بترقية المعلمين الموجودين على رأس عملهم الذين أتموا المدة البينية للترقى فى أول يوليو 2023 والحاصلين على تقرير فوق متوسط لآخر عامين وبدون تدريب أكاديمية المعلم او اجراءات أخرى. تخيل كدا المعلمين وهم بيسمعوا القرار ده ونصف مليون معلم واسرهم واهاليهم ومحبيهم فرحانيييين جدا ومبسوطين بهذا القرار الغير متوقع. احنا فعلا محتاجين فرحة. والقرار ده ح يكون نواة لتعديل تشريعى فى الكادر لتعديل شروط الترقى لتصبح مثل شروط الترقى بقانون الخدمة المدنية.
2- سأقوم بإصدار قرار بصرف مكافأة الملاحظة والتصحيح الخاصة بأعمال شهادة الثانوية العامة والدبلومات الفنية من ميزانية الادارات التعليمية فور وصول استمارات 114 الى الادارات على أن تقوم الادارات والمديريات بالتيسوية النهائية مع حسابات الوزارة فور الانتهاء من صرف مكافآت الدور الاول والثانى معا . لحظتها المدرس ح يطير من الفرحة لأنه اخد حقوقه المادية بسرعه. ودى فرحة تانى لوحدها.. كذلك صرف المتأخرات المالية للمعلمين مثل مكافآت المدربين لدى الأكاديمية.
3- سأقوم بالغاء شروط صرف حافز الاداء وكذلك شروط صرف علاوة الاعباء الوظيفية وصرفهم بدون شروط لحين وضع شروط جديدة للصرف تعيد للمعلمين الثقة. المعلم لو حصل على تقرير اقل من كفء بيتحرم من صرف 1000جنيه من مرتبه لمدة عام. ف اصبح المعلم يخشى بعض الاعمال احيانا خوفا من الوقوع فى الخطأ والحصول على جزاءات تؤثر على مرتبهم الشهرى.
4- سأقوم برفع قيمة بدل المعلم وبدل الاعتماد ومكافأة الامتحانات اللى ليهم 10 سنين ثابتين ماليا لم تتغير قيمتهم. وعلى حسب كلام الناس هو ليه م يرفعش قيمة الكادر اللى بيتصرف بلا شروط وبيرفع قيمة حافز الاداء اللى بيتصرف بشروط. يا عم هو عايز يوفر شوية فلوس من المعلمين اللى مش ح يصرفوا حافز اداء بسبب الجزاءات دول ناس ناصحين بيوفروا على حساب الغلابة. وبصراحة الخلايا النايمة بتغنى على المعلمين بتلك النقطة دايما ف بكدا احنا ح نفطس الخلايا النايمة.
5- سأقوم بإلغاء منظومة البيرول للأجور اللى كل الناس بتصرخ منها شهريا وكل شهر مشاكل البيرول والمرتبات.
6- ح ارجع المعاش المبكر علشان فيه ناس امنية حياتها تسوى معاش وكمان ده ح يخلق فرص عمل لشباب الخريجين.
7- ح أطلب التعاقد الفورى مع العشرة الاوائل من خريجى كليات التربية (عام + ابتدائى ) فى وظيفة معلم مساعد من دفعات 2019 وما بعدها فى مختلف التخصصات بجانب ال 30الف المقررة سنويا. مع سرعة انتهاء اجراءات التعاقد قبل اول اكتوبر.
8- ح اعمل اغسطس اجازة على ثلاث اجزاء للمعلمين كل مجموعة من المعلمين 10ايام اجازة مدفوعة الاجر.
9- ح الغى كثير من وظائف الادارات التعليمية مثل المتابعة وتقويم الاداء ( والله المدرسين ح يعملوا فرح لو اتلغت ) ودمج التطوير مع الحاسب الآلى والغاء الاعارات واسناد عملها للموارد البشرية.
10- ح اخد قرار بتدريس المواد الغير مضافة للمجموع بالثانوى العام اون لاين.
11- ح اغير لائحة الانضباط قرار وزارى 287 لمزيد من الحزم والردع للطالب ولضمان هيبة افضل للمعلم ومزيد من الحماية له.
12- ح اعمل الحضور والانصراف فى الادارات التعليمية والمديريات التعليمية بالبصمة لضمان الانضباط وسرعة انجاز خدمات الجماهير.
13- الحلم الكبير اضم المعلمين لجدول اجور العاملين بقانون الخدمة المدنية واعمل تعديلات تشريعية فى قانون الكادر اللى عملوه الاخوان فى 2012.
يارب يتحقق الحلم ده واشوفه يتحقق على أرض الواقع. يا رب.
