كلام الناس بالشارع (٤)

الناس مواقف وكلام الناس مش بينتهى ولا ح ينتهى .لكن استخلاص الكلام وصياغته دى اهم أمر . ليس من السهل الحديث عن ما يقوله الناس ولولا حرية الرأى م كنت كتبت . فكل التحية لكل من يقرأ ويتابع وكل من ينصح.  شكرا لحرية التعبير . . لكن ماذا يقول الناس فى جديدنا اليوم. 

١- اول صوت لازم يوصل صوت الصعايدة ومشاكل تخفيف الأحمال . احنا عايشين مع الشمس نفسها . تخفيف أحمال ايه بس . خفف الأحمال ف المدن الساحلية براحتك واعمل كل اللى نفسك فيه ( دا كلام الناس). لكن عند المنيا . أسيوط.  سوهاج . قنا . اسوان . الوادى الجديد . دول آسف وابوس ايدك خارج تخفيف الأحمال.  لكن ممكن تخفف أحمال فيهم بطريقة افضل بدون قطع تيار وهو قرار من فوق بوقف تشغيل التكييفات فى جميع المكاتب الحكومية من اول مكتب المحافظ حتى أصغر مدير إدارة خدمية . لكن فصل التيار واحنا بنتشوى لا لا لا . تخفيف أحمال فى الوجه البحرى عادى جدا لأن الجو لطيف شوية عن الصعيد . 

٢- الدولة قامت بترقية الناس اللى تجاوزوا المدة البينية للدرجة فى ٦/٣٠ . طب حد يقول ليهم يثبتوا الشباب اللى بعقود مؤقته على الدرجات الخالية طالما هم محتاجين الناس دى . الشباب دى محتاج فرحة وانت عندك درجات خالية . 

٣-  إجراءات تعيين  اول دفعة من تعاقدات المعلم المساعد ال ٣٠ الف معلم .طولت ليه الإجراءات. دا اول مرة يحصل كدا مع دفعة تعاقدات من إجراءات !!!! مع احترامنا للاجراءات. 

٤- هم ليه م يعملوش قرار ممنوع تشغيل التكييفات ف المصالح الحكومية طالما درجة الحرارة اقل من ٤٠ ولمدة ساعين يوميا . هو المسؤولين يقدروا يعملوا زى كدا ف بيوتهم . المراوح قالت ايه ؟ طالما بنتكلم عن تخفيف الأحمال وافتكروا  المهندس رئيس مجلس الوزراء / ابراهيم محلب لما عمل توفير للكهرباء وعقد الاجتماعات الصحفية فى حديقة مجلس الوزراء. 

٥-  عندك عجز مدرسين طب عين شوية من خريجى تربية اللى نايمين ف البيوت . هو اتجهزوا لحاجة غير انهم يكونوا مدرسين؟ محدش ح يرضى يشغلهم فى اى شغلانه تانى . الناس دى اتعلمت واتخرجت علشان وظيفة محددة .

٦- حماية المستهلك نزلت الشارع وبتشوف الأسعار وخاصة السجاير . لكن ليه م يركزوش مع المخابز ويشوفوا المعجونات بتتباع  حسب القرار الوزارى ولا لأه . ليه م يركزوش على اسعار الفاكهة اللى اقل حاجة دلوقت الكيلو ب ....... ؟ ركز فى حماية المستهلك ع كل ما يتعلق بالطعام والشراب . ركزوا ف مجال الغذاء واضبطوا الأسعار . قولوا للشركات تكتب السعر على المنتج ولا التعليمات دى اتلغت . 

٧- المحليات عامله ايه مع ظاهرة ( رش الشوارع ) ، احتلال أصحاب المحال للشارع.، نظافة الشارع ، محلات ومطاعم بلا تراخيص بلا إجراءات وعوامل الأمان. وكمان بلا تراخيص الصحة .

٨-  امتى ح ناخد فاصل ؟ من لسان معلمى الثانوى العام . من شهر مايو امتحانات متصلة مايو امتحانات النقل يونيو ويوليو الثانوية العامة ورجعوا مباشرة على امتحانات الدور الثانى للنقل فنتيجة امتحانات الثانوية العامه ثم امتحانات الثانوية العامه الدور الثانى . اين الراحة الذهنية والنفسية اللى أخذها معلم الثانوى زى الابتدائي والاعدادى؟.

٩-  التجارة مع الدول العربية لو بقيت بالجنيه المصرى بدلا من الدولار .  فى كل أزمة اول تفكير ليهم ان مصر ح تساعدهم و مش ح تسيبهم . طب خليكوا مع مصر ف ازمتها بدون م تدوها لكن تعاونوا معاها . 
هم بيستوردوا من مصر وبيزوروا  مصر كسياحة وعندهم مصريين بيشتغلوا يدوهم جزء من المرتب بالجنية وبكدا يرجعوا لينا الجنيهات اللى بندفعها عند الاستيراد منهم وكمان ح يدعموا مصر فى القضاء على السوق السوداء العاملين بالخارج لو قبضوا جزء من مرتبهم بالجنية المصرى اللى ح يستلم الحوالة من البنك مش ح يروح سوق سودا لانه متحول له جنيهات ف بكدا ح تيجى ليا حوالات العاملين بالجنيه وبالعملة الصعبة ف ح اوقف جزء من نشاط السوق السوداء بالداخل والخارج . لكن حوالاتهم  بالعمله الصعبة ح تستمر . ( رؤية شخصية)

١٠ -  الدول العربية  ليه م ارجعش ليهم قيمة الوديعة بتاعتهم  بالجنيه بدلا من  الدولار . وهم يرجعوا ليا الجنيهات  لما يستوردوا من عندنا او يستثمروا عندنا ويبقى ريحونا واستفادوا برضوا . والسوق السودا تفارق الحياة . وكمان ممكن يستوردوا من مصر بقيمة الوديعة والدولة تحاسب الشركات المصرية بالجنية . ( رؤية شخصية)

١١- ليه م نعملش معرض لبيع العملة المصرية كعملات تذكارية فى معارض تقام خارج مصر وده ممكن يجيب ليا إيرادات بالعملة الصعبة وكل مكان ف العالم به هواة لجمع واقتناء العملات التذكارية.  ( رؤية شخصية)

احيانا احنا بنسمع من الناس إبداع.  لكن من يقرأ لكى ينفذ ؟ .. حمى الله مصر .. والله الموفق والمستعان…