كلام الناس بالشارع
مصر ستظل دايما هى التميز هى القوة البشرية والعسكرية الأولى وصاحبة الكلمة العليا فى منطقة الشرق الاوسط حتى مع ظهور كيانات تبرز كل فترة لكن مصر هى مصر محدش بيكون حاجة من غير كلمتها مهما كانت قوته الاقتصادية ز لكنه لا يملك ان يكون مثل مصر. مصر مهما كانت أزماتها فهى قادرة على تجاوز الصعاب.. لكن لكل مرحلة رأى بالشارع والرأى ده بشوفه فى الشارع فى المقاهى واثناء استماعى للناس. وفيه ناس صديقه ليى بتقول ليا اكتب يمكن حد يشوف ويطبق. الناس محتاجه من يستمع اليها ويرد عليها بلغتها ويطمنها ويريح بالها ولا يوجد سوى القائد الانسان الذى ينفذ ذلك ونبهنا بمقولته " م تصدقوش حد غيرى " و" اشتغلوا وانا معاكوا ". فما هى الاحاديث التى تدور فى اوساط المواطنين:
1- فى بيتنا بالتعليم هو ليه م نعملش مساواه للمعلم بالعاملين بقانون الخدمة المدنية فى نظم الترقى. فى قانون الخدمة المدنية اى موظف يتجاوز المدة البينية بيحصل على الترقية بصورة اليه بعد قرار رئيس مجلس الوزراء لكن فى قانون كادر المعلم والذى اصبح به جزء من تكدير المعلم لازم تقدم اخر تقريرين وتتدرب وتقدم اوراق وتدفع رسوم للاكاديمية علشان تترقى. صمت المعلمين ليس رضا وانما خضوع لأمر واقع والمعلم مكبوت بسبب ذلك الامر وح تيجى لحظه وح تكون المواجهة صعبة.. ليه م نرجعش الترقيات زى زمان لشؤون العاملين بالمديريات ونلغى دور الاكاديمية فى مجال الترقى. ليه التعذيب ده علشان اخد ترقيتى وتدريب وامتحانات واكاديمية واختبارات على الانترنت. هو ده بيحصل مع مين تانى فى الدولة غيرنا نحن معلمى مصر ؟.. انا بتمنى من بيتنا وزارةالتعليم ان تطالب بتعديلات تشريعية فى قانون الكادر لانصاف المعلمين اسوة بباقى موظفى الدولة. والدولة بتساند اى وزارة عايزة تشتغل فأتمنى الا يكون هناك حرج زائد وان تطالب وزارتنا بعمل تعديلات تشريعية وقانونية بقانون الكادر.
2- المتأخرات الخاصة بالمعلمين مثيرة للجدل خاصة مكافأة امتحانات صفوف النقل هى ليه احيانا بترحل للميزانية الجديدة رغم انها محتسبة ضمن الحد الأدنى للمرتب الشهرى ولماذا لا تقوم المالية بصرفها مع المرتب الشهرى بدلا من صرفها بصورة سنوية ؟.. نفس الكلام المدربين وهيئات الاشراف التى قامت بالتدريب والاشراف على ترقيات 2016 و2017 أين مكافأة الاشراف والتدريب لهؤلاء الزملاء. كيف تتأخر مستحقاتهم عن التدريب والاشراف على التدريب لمدة تزيد عن العام. هل القيادات المشرفة على التدريبات بالوزارة والاكاديمية مستحقاتهم متأخرة ام انهم حصلوا عليها ولو المديريات متأخرة فى ارسال البيانات لماذا لم تبرىء الاكاديمية نفسها وتحيل المتأخرين للتحقيق ؟
3- الناس عايزة عودة تراخيص البناء. والمفروض انك قفلت التراخيص من أجل أمر معين ومش معقول اقتصادى بيعانى واكون قافل تراخيص البناء وبالعامية يا سيدى افتح التراخيص مقابل 5000 جنيه لكل دور بالرخصة والتوريد يكون لحساب وزارة المالية مباشرة. خلال 3 شهور ح تكون جمعت مليارااات وكمان انت مستفيد ح تشغل العماله الغير منتظمة بدل م تديها معاش وح تشغل حرف مواد البناء وح تنشط الحصيلة الضريبية. ح تحرك السوق من الركود فى بعض الامور. مش عارف احنا ليه م نفتحش التراخيص مرة اخرى ودى ممكن تكون مورد هام للدولة ومحرك للنشاط الاقتصادى.
4- القانون الخاص بتحليل المخدرات نحترمه لكن لازم وقفه انت خوفت الناس بالقانون اللى عنده كحة وبياخد دواء للكحة فيه نسبة مخدر. ادوية الجهاز الهضمى بها نسبة مخدر. ادوية الحساسية بها نسبة مخدر. طب الناس تثبت برائتها وحسن نيتها ازاى ؟ بلاش يتعالجوا ولا ح تعمل ضغط واحمال زائدة على المستشفيات والتأمين الصحى وانت عندك عجز فى الاطباء والمستشفيات. لازم ننتبه ونعدل مش نعمل خوف وقلق للناس ونزود ضغط على المستشفيات والتأمين الصحى.
5- حتى القروض الشخصية بالبنوك بقيت مشكلة فى ظل ارتفاع اسعار الفائدة وكانت محرك للنشاط الاقتصادى. القروض الشخصية كانت هامه فى تحريك سوق السلع المعمرة. ارتفاع الفائدة صعب الامور على المواطن.. طب ليه م نعملش القروض الشخصية بناء على متوسط الفائدة خلال مدة ثلاث او خمس سنوات قادمة. ليه م نعملش تجديد للقروض الشخصية الحالية بنفس سعر الفائدة وقت الحصول على القرض وليس سعر الفائدة الحالى فى حالة رغبة العملاء. الضغوط الاقتصادية وبعض الركود ح يتحرك. احنا نقدر.. وتخفيض سعر الفائدة مهم لتنشيط الاستثمار المحلى لتقليص ضغوط الاستثمار من جانب الدولة.
6- للمرة المليون الاستثمار فى التعليم هو افضل انواع الاستثمار. ح يبنيلك مدارس ح يشغلك البطالة ح يجيبلك ايرادات ضريبية وايرادات لوزارة التعليم وح يوفر للدولة تكلفة الانشاء فى بعض المناطق وح يزيد من القدرة على استيعاب الاطفال فى مرحلة رياض الاطفال ؟ فين وزارات الاستثمار والتخطيط والمالية والتعليم من هذا الشأن ؟
7- التضخم المرعب شغال فى العالم كله التضخم - ح اقولك اوك. لكن ح اقولك كام جملة من قلب الشارع اكيد عارفينهم " الحاجة اللى سعرها بيطلع فى مصر م بتنزلش " " مش عايزين زيادة مرتب ويثبتوا الاسعار ".. اما عن اسعار الذهب " دول مسيطرين، هو فيه حد قادر يكلمهم ". أين يد الدولة فى سوق الذهب ؟ وم تقولش فتحنا الاستيراد ولا الضغط كبير فى السوق والطلب والعرض. هو ايه بيحصل فى السوق ؟
8- السوق السوداء المواطن هو ممولها الأول وبموافقة الدولة. لو جايلك تحويل بالعملة من الخارج يكون هناك خيارين فقط لا غير. وضعها فى حساب جارى بالبنك او تحويلها للحساب الجارى لأى فرع بالبنوك وبدون عمولة او تحصل عليها يا مواطن بالعملة المحلية. كدا ح تسيطر جزئيا بنسبة قوية ؟
لكن ليه ياخد العملة الصعبة نقدا فى يده هو ح يشترى بيها طماطم او فاصوليا او لحمه ؟ لازم اجرااااء قوى.. الاصلاح الادارى هو نصف الاستقرار ويمثل جزء كبير من الرضا والراحه لدى المواطن. مش كل حاجة الفلوس. الاصلاح الادارى يوفر اموال ويجلب اموال. لكن لازم نتحرك بسرعة " احنا م عندناش وقت ".
