وائل كامل محذرا أساتذة الجامعات من "تعديل قانون الجامعات": "الكل هيلبس الجلابية ويرجعوا لقانون مفيد شهاب"
الثلاثاء 19/أكتوبر/2021 - 04:32 م
علق الناشط التعليمي وائل كمال، في تدوينة له علي جروب اعضاء هيئة التدريس بكل الجامعات المصرية، علي قرار مجلس الوزراء بالموافقة علي تعديل عدد من أحكام قانون تنظيم الجامعات الصادر بالقانون رقم 49 لسنة 1972، مشددا علي الآتي:
- التعديل دة بيقول ان كل من لم يترقى وبلغ المعاش لن يصبح استاذ متفرغ مهما كانت درجته الاكاديمية كعضو هيئة تدريس كما كان ينص عليه القانون الحالي.
- الاستاذ المساعد لما كان بيطلع معاش في القانون الحالي اسمه بيكون استاذ متفرغ وبيكمل بعد المعاش، دلوقتي التعديل دة عايزينو يصبح استاذ مساعد متفرغ .
- طبعا حضرتك هتقول ماهو كدة صح..!! اقولك انا ان التعديل لا يهدف لتغيير مسمى فقط لانه بالفعل فيه جامعات بتكتب دلوقتي استاذ متفرغ وبين قوسين (مساعد) . او مدرس بالمعاش في وظيفه استاذ متفرغ .
- هذا التعديل الجديد سيتبعه تعديل ٱخر ان كل من لم يترقي لن يستمر بعد المعاش.. او اللي هيستمر بعد المعاش هو مسمى استاذ متفرغ فقط لاغير ، والاستاذ المساعد المتفرغ والمدرس المتفرغ يقعدوا على باب السيده يشحتوا بمعاشهم اللي هو الف ونص.
- هما قصتهم كلها انهم عايزين يوفرو فلوس .. وواحدة واحدة هياخدوا الكل في طريقهم.. وهو تعديل مؤقت لغاية لما يمر ، ودرجة الاساتذة يسكتوا لانه لن يمسهم، وبعدين في القانون الجديد .. الكل هيلبس الجلابية ويرجعوا لقانون مفيد شهاب عشان يشغلوهم بملاليم وبعقود في الخاصة والاهلية.
- الناس هتقول وقتها (اكلت يوم اكل الثور الأبيض)..! نفس قانون مفيد شهاب عايزينو يرجع بس بشكل اكثر تحديدا.. ويبقى كل تخصص فيها استاذ متفرغ واحدة او اثنين، و كل سنة يتذلل بطلب يقدمه لتلاميذه ويا وافقوا يمدوا له يا يرفضوا..!
- الجامعات الخاصة والاهلية هيكون عددها كبر.. وبدل ما كانوا بيدفعوا رواتب بالعشرين والتلاتين الف.. هياخدوا اللي قعدوهم في بيوتهم واللي معاشاتهم الف ونص.. ويعرضوا عليهم الفين تلاتة وبعقد سنوي يتجدد له او لا.
