تعرف الخرافات التي تعلقت بأسطورة الأهرامات المصرية
الجمعة 13/أغسطس/2021 - 03:34 م
نشرت صفحة تاريخ مصر القديم علي موقع التواصل الاجتماعي "فيسبوك"، بشأن الخرافات التي تعلقت بأسطورة الأهرامات المصرية.
وإليكم نص التقرير:
البعض بينقد حقيقة ان الاهرامات المصرية كانت مدافن لملوك مصر العظماء مع ان معظم الأدلة والنصوص بتشير لكده مع فلسفة مبهرة للمجموعات المعمارية الهرمية اللى أى هرم جزء منها.
وفى نفس الوقت البديل المضحك للحقائق العلمية دى ان الاهرامات مولدات طاقة (حجر انيرجيزر كبير يعنى) وماتفهمش بيولدوا منها طاقة ايه بالضبط؟
واللى يقولك قوم عاد، والاهرامات اتصبت بالطين وعالم كامل متكامل من الخرافات.
وكل اصحاب الخرافات دى بيتفقوا فى اتهام الدارسين حول العالم بمختلف جنسياتهم حتى المصريين إنهم متآمرين 😅.
كل المؤسسات العلمية ذات الميزانيات المهولة واعمال الحفائر والتنقيب وآلاف الكتب العلمية والعلماء غلط ودول اللى صح.
والموقف ده مش مستغرب لأن معظم العلوم دلوقت لها خرافات موازية، المحصلة النهائية ان العلم آخر حاجة بيتم تصديقها وتداولها وده مؤشر شديد الخطورة بيقيس مدى وعى الشعوب
التهويل والتخاريف عن تاريخ مصر مش بتزوده عظمتة ولا بتقلل منها، هى بس بتوضح فكر ثقافة وعلم المتحدث،اللى مهما كان كلامه منمق او معسول فالعلم لا يتم تصنيفه بهذه الطريقة إطلاقا ومعروف منذ القدم ان جذب الانتباه والشهرة طوال التاريخ طريقه الاسهل ترويج الخزعبلات لأن طبيعة البشر دوما تميل للخيال والخرافات والمعلومة السهلة حتى لو خاطئة.
العلم مهما كانت حقائقه بطيئة فى كتابتها والحصول عليها ومهما كانت خطواته صعبة إلا انه يظل الشيء الوحيد اللى يقدر يفهم منه الإنسان كل شيء حواليه وله متعة لا تضاهى، المعرفة قوة وسلاح الإنسان والحضارات طوال تاريخ بنو الإنسان.
ابحث عن الكتب العلمية عن اهرامات مصر، سليم حسن، احمدفخرى، مارك لينر ، زاهى حواس وغيرهم، ابحث عما كتبه علماء آثار حقيقيين ومتخصصين مش اطباء ومحامين ومهندسين وأى واحد معدى مع احترامنا لهذه المهن الراقية.
