محمد علاء تعليقا علي انسحاب لاعب الجزائر من أولمبياد طوكيو بسبب "إسرائيل": "بطل من ورق"
الخميس 22/يوليو/2021 - 11:14 م
علق الإعلامي محمد علاء رئيس قسم الرياضة الأسبق، في تدوينة علي صفحته علي موقع التواصل الاجتماعي "فيسبوك"، علي خبر انسحاب لاعب جزائري من أولمبياد طوكيو بسبب "إسرائيل" واصفا اللاعب الجزائري بـ"بطل من ورق".
وإليكم نص التدوينة:
الخبر ده اتكرر كتير السنين اللي فاتت، والحقيقة أنا مش قادر أتعاطف معاه ولا أحس تجاهه بأي نوع من الوطنية أو تسليط الضوء على القضية، بالعكس مش شايف فيه غير مزايدة وحنجورية فارغة.
حضرتك إنت بلدك وأهلك ومدربينك مكلفين وتعبانين وصارفين ومضحيين لسنين وسنين عشان توصل للشرف والمكانة إنك تدافع عنها وترفع علمها ف أهم تجمع على الكوكب، وتيجي سيادتك ف لحظة اندفاع تمحي كل ده بدون أي إحساس.
حضرتك أو غيرك اتفاجئت إنك ممكن تلعب قصاد إسرائيلي ولا ضحكوا عليك وقالولك إن إسرائيل مش مشاركة ف الأولمبياد؟
طيب حضرتك لو كنت قاعد إنت ولا اخواتك ولا قرايبك قاعدين في فرنسا ولا ألمانيا ولا هولندا ولا بلجيكا ولا إنجلترا مش بيشتغلوا معاهم ولا بيشوفوهم ومش بعيد يكون كتير منهم مديرينهم أساسا إسرائيليين ولا لما ده بيحصل بيسيبوا الشغل، ولا ده بس لزوم الشو الإعلامي، لكن بعيد عن الكاميرات كله ماشي؟!
وهل معنى كده إن باقي زمايلك سواء من بلدك أو البلاد التانية اللي هيلعبوا قصادهم دول خونة يعني؟
بلاش دي ودي هو انت مش شايف إنك لو كنت بتحترم لعبتك وجمهورك وبلدك كان الأحسن إنك تلاعبه وتكسبه، ولا انت خفت يحط عليك ف قلت تعملها بجميلة وتبقى بطل من ورق؟
أخيرا بقى كان في عشرات غيرك بيحلموا ياخدوا الفرصة اللي أخدتها وفرطت فيها، ومادام انت كان عندك أولويات أهم من شغلانتك ف الأولى إنك كنت تبقى أكتر احترام لزمايلك وتسيب حد فيهم يعمل حاجة ليها قيمة بجد
