هل الملكة نفرتيتى سورية؟
الخميس 22/يوليو/2021 - 05:43 م
وإليكم نص التقرير:
من أغرب الاشياء اللى شوفتها فى حياتى حاجة بسميها "مهرجان الحضارة للجميع" وده مصطلح بيعبر عن إن شخص من شعب مجاور أو شقيق زى سوريا يقول مثلا إن الملكة نفرتيتى سورية "كردية" مش مصرية وغيرها من خرافات كتير، وده عادى فى خرافات لشعوب كتير من النوع ده والرد عليها موجود ومحسوم.
الأغرب بقى هو رد فعل ناس "مصريين" بتدافع عن الكلام ده باعتبار انهم اخواتنا وحبايبنا ومجتش على التاريخ يعنى كلنا اخوات ودى أرض الله الواسعة ويفضل يسوقلك المبررات وتلاقيه فيلسوف حكيم جدا وهو بيتكلم ويمكن يجيبلك مبررات هو شايفها "دينية" علشان يبرر موقفه العجيب ويوزع تاريخنا كأنه بيوزع صدقات، ولو جيت تتكلم يمكن يشتمك كمان !، فى دى بس فيلسوف أما المعرفة بتاريخ مصر نفسه فمفيش!
الاخوة والمحبة حاجة والحقائق التاريخية حاجة تانية، تاريخنا ده مش ملكية خاصة ولاديكور نوزع منه شبرقة على أى حد علشان بنحبه، ده تاريخنا وأصلنا وفصلنا لايتبرأ منه سوى جاهل أومتطرف.
ولو اثبتله خطأ تلك الخرافات بالدليل القاطع بيلجأ دايما للحجة الكوميدية الشهيرة "كلمنى عن الحاضر متكلمنيش عن الماضى" ، وأصل كلنا ولاد آدم !!!
معندوش مانع يلغى دراسة التاريخ نفسه بس المهم يتبرأ من التاريخ ده ويغسل ايده منه، موضوع غريب جدا الصراحة ومتكرر مش فى موقف واحد، لا كتير جدا جدا.
الأدهى من ده كله لما ألاقى صديق سورى عزيز هو اللى بيدافع عن تاريخ مصر!!
اسأل نفسك ليه الأمم الأخرى بتحاول تنسب نفسها لمصر؟
لو عرفت إجابة السؤال ده هتفهم أد ايه تاريخ مصر عظيم ومش هيتكرر تانى.
