طالبة بالثانوية العامة : تم سحب كتابي من رئيس اللجنة و السبب كتابة ملاحظاتي فقط
الثلاثاء 13/يوليو/2021 - 11:06 م
نشرت طالبة في الشهادة الثانوية اليوم تدوينة علي جروب تالتة ثانوي علي موقع التواصل الاجتماعي "فيسبوك" تضمنت الآتي:
اليوم ١٣/٧/٢١ امتحان اللغة الثانية للشعبة الأدبية مقر اللجنة مدرسة السلحدار المتميزة للغات بالسبع عمارات لجنة (٣) :
تم سحب كتابي من رئيس اللجنة أثناء الامتحان و السبب كتابة ملاحظاتي فقط !
لما قولت ان ده قرار وزاري و انا كاتبه ملاحظاتي بالكمية اللي انا عايزاها على اساس قرار د. طارق شوقي .
و انه كتب على صفحته الموثقة علي الfacebook كان الرد كالآتي:
- مين قالك انه هو اللي كاتب؟ ممنوع كتابة اي ملاحظات حتى ولو قليلة ممنوع الكتابة اصلا! ، احنا سايبينكوا بمزاجنا ! الوزير رجع في كلامه و بلغنا !
سألته : طب ليه منزلش القرار لينا عشان نعرف ليه فجأة أثناء الامتحان هو لو نزل قرار جديد هيكتب ده ، تقريبا بيطلع كل يوم مع عمرو أديب ليه هيبقى قرار سري مثلا؟
ملحقتش اكمل كلام و كان بالفعل تم سحب كتابي و كتب زمايلي في اللجنة أثناء الامتحان..
سألته عشان اطمن انه على الكل مش عليا فقط ؛
حضرتك القرار ده هيمشي على باقي اللجان ؟ و على باقي المدارس و الطلاب قال لي اه .
خلصت اللجنة و الامتحان و استلمت كتابي و انا ماشية اكتشفت انه تم سحبه من لجنتي فقط و مدرستي فقط!!
و الكلام اللي رئيس اللجنة قاله ليس له اساس من الصحة.
الكاميرات موجودة في اللجنة و الوزارة تقدر ترجعلها و تشوف اللي حصل بالظبط .
المراقبين و المدرسة و زمايلي يشهدوا اني مبغشش و لا معايا حاجة اغش بيها ولا عايزة اغش و المراقبين محدش اشتكى مني خالص ولا أسلوب ولا محاولة اني ابص ورايا او جمبي او ارد على حد فقط امتحاني و ملاحظاتي و كتابي اللي تم منعي منه (حقي) .
اتمنى يتم التصرف لان المواد اللي جايه صعبة و مش هقدر اتنازل عن حقي و كتابي تاني .
