تعرف علي عصر الملك "زوسر" صاحب الهرم المدرج

أول حاجة هو إن اسم الملك هو "نترى-غت" "ذو الجسد المقدس" وهو الإسم اللى إتعرف بيه فى عصره , اما فى العصر الحديث فالكتب بتقول عليه "زوسر" وده لأن لاحقا النصوص المصرية القديمة إدته اسم تانى وهو "جسر" بكسر الجيم وتعطيشها , وهى كلمة مصرية قديمة معناها "المقدس" , "وجسر" هو الاسم اللى تم اغرقته فبقى زوسر , يعنى زوسر فى حياته وبعد مماته محدش عرفه بإسم زوسر.

"نترى-غت" كان دولته قبضتها قوية وإيديها طايلة وصلت لسينا فى حملات تأديب للبدو اللى عايشين هناك علشان الاضطرابات اللى بيعملوها على الحدود إيمانا منه بأهمية المنطقة دى كحلقة وصل بين مصر وآسيا كلها , كمان من هناك جابوا النحاس والفيروز من المناجم .. الفيروز كان بيسميه المصرى القديم "مفكات" وسينا كان إسمها "تا مفكات" ارض الفيروز .

حكومة "نترى -غت" ولأول مرة فى تاريخ مصر بيظهرلنا اكتر من ثانوية فى وظائف ادارية مرموقة زى "إيمحوتب" وزيره ومهندسه , وكذلك "حسى-رع" وزيره ايضا وأول طبيب اسنان فى التاريخ المسجل .. اللى عاوز اقوله ان قبل زوسر كنا عارفين ان فى وظيفة اسمها "وزير" وهى تعادل رئيس وزراء حاليا وعارفين بعض مهماه , ولكن فى 

عصر زوسر اللقب تكرر لأكتر من شخص مع ظهور موظفين ليهم القاب واضحة ومحددة وتدرج وظيفى حتى للموظفين دول , ظهور حكومة بشكل وضح ليها هيكل ادارى متشعب .. كانت فترة ازدهار ادارى واضح وترسيخ للبيروقراطية المصرية العتيدة .

هرم "نترى غت" , الهرم الأشهر المدرج فى سقارة فى حاجتين مهمين جدا متعلقين بيه الأولى هو أن علماء الاثار عثروا على بقايا قم محنطة واجزاء من الجسد بداخل التابوت وبيرجحوا إنها للملك نفسه إلا ان لترجيح ده مش قاطع ويمكن البقايا دى من دفنة احدث , الحاجة التانية المتعلقة بالهرم وهو إنه اتعمل له ترميمات فى العصر الصوى المصرى لما الملوك الوطنيين وقتها وجهوا جهودهم ناحية ترميم الاثار العظيم ده وحمايته من الإنهيار ..