سيدة القطار.. والكمسرى والعسكرى
الجمعة 11/سبتمبر/2020 - 08:22 م
تصدرت سيدة القطار المعلمة صفية ابو العزم مشهد السوشيال ميديا والمواقع الاخبارية من يوم وليلة بسبب جدعنتها التى تربت عليها، بالاضافة الى انها معلمة فاضلة، قامت بالتدخل لحل مشكلة احد جنود القوات المسلحة مع كمسارى احد القطارات بسبب ثمن التذكرة وما كان لها الا ان قامت بدفع ثمن التذكرة.. وقام الكاتب الصحفى الشاعر مختار معتمد نائب رئيس تحرير جريدة الجمهورية باهداء هذا الشعر لابطال المشهد المعلمة وجندى القوات المسلحة والكمسرى..
فى القطر قط وفار
الاول معندوش نظر
والتانى محتاج قرار
بدل المهانة عمال على بطال
يعفيه الوزير من ذل السؤال
من اول مايركب.. فين تذكرتك
ادفع لتزل متتعشمش انا مش جوزخالتك
طيب انا هسال الكمسارية سؤال
هو البعدا ماشفوش الافرول
يا الوزير أعفى من اول العسكرى للصول
من دفع الاجرة فى المواصلات
كل إللى لابس بدلته الميرى يتعامل كما البهوات
بوقار واحترام
عشان حرام
تهين عسكرى شقيان
ليه بترخموا هو انتوا ماشين بمسطرة وميزان
وقبل مانسى
تحية لصاحبة اللمسة
الست الجدعة اللى دافعت عن كرامة العسكرى
ووقفت فى وش الكمسرى المفترى
وده مش غريب على ستاتك يامصر ياولادة
والجدعنة عندنا فى الستات عادة
والتاريخ شاهد والأمثلة بزيادة
