مفاجات فى التحقيقات مع فتاة التيك توك "مودة الادهم"

وتبين من التحقيقات قيام المتهمة مودة الأدهم بإرسال مقاطع فيديو تقوم فيه فى الرقص بملابس فاضحة، بالإضافة إلى شات جنسي بينها وبين أحد الأشخاص.

وقالت مودة الأدهم فى اعترافاتها: "أمي مهندسة زراعية على المعاش ووالدي أمين شرطة على المعاش وأبويا حالته المادية كويسة جدا عشان هو وارث من والده، وهو عنده فدادين زراعية بكوم حمادة وعنده عمارة بمرسى مطروح وعنده عمارة في كوم حمادة، ومصادر دخلى من أهلي ومن اليوتيوب، ومن البيوتي سنتر اللي أنا مشاركة فيه "إيناس. ا"، بنسبة 20% ومعنديش حاجة تاني".

وأضافت مودة الأدهم أن "ما أثبتيه التحريات عن انتمائي إلى أسرة بسيطة الحال وانفصلت عن أهلي بمرسى مطروح منذ 3 سنوات كلام محصلش، هو أبويا طلع على المعاش مبكر وكان وارث من جدي وحالته المادية كويسة وعنده عمارتين ورث".

وتابعت مودة الأدهم: "بدأت استخدم مواقع التواصل الاجتماعي منذ 4 سنين ولم يرشدنى أحد لذلك، وبدأت استخدام مواقع التواصل عن طريق لما ابتديت أتعرف لما دخلت ميس إيجيبت، وابتدت تظهر ليا صور على السوشيال ميديا، ولما ابتديت أعمل فيديو للتسلية والهزار أنا وأصحابي وجابلي نسبة مشاهدة بالملايين بعد لما نشرتها على موقع ميوزكلي اللي اسمه دلوقتي التيك توك فابتديت أتعرف في مجال السوشيال ميديا، والحسابات بتاعتي الموثقة تيك توك وإنستجرام وقناتي على يوتيوب ومعنديش أي حسابات على فيس بوك، أنا كل حساباتي بس اللي قولت عليها هي اللي موثقة وأي حسابات تانية موجودة مش خاصة بيا".

وأكدت مودة الأدهم: "أنا ماليش أي علاقة بتطبيق لايكي غير من سنة مجموعة من أصحابي قالولي إن ليا فيديوهات بتنزل على التطبيق فدخلت أشوف الفيديوهات وبس وكانت الفيديوهات دي عبارة عن فيديوهات تسلية وهزار وأنا بحرك شفايفي مع أغنية معينة ونزلها تطبيق لايكي لجذب مشاهدات دون موافقتي وعملوا كدا مع نفسهم، ولم أتحصل على مقابل مادي جراء نشر تلك المقاطع على تطبيق لايكي، ولم أتخذ أى إجراءات قانونية حياله، لأن أنا مكنتش فاضية أعمل إجراءات قانونية عشان كنت مخطوبة".

وقالت المتهمة: "المقاطع اللى على حسابي على إنستجرام وهو الحساب الموثق، أول حاجة دا أبلكيشن لايك مش لايكي يعني دي شركة ودي شركة تانية خالص وأنا كنت بعمل عمل خيري لمستشفى 57357، ومحصلش إنى قمت بالتعاقد مع شركة لايكي من أن كان اسمه داخل مصر لايك ولا توجد أى علاقة مع مديري التطبيق من خلال المتهم محمد محمود محمد محمود محجوب والمتهمة مارجين ولم يتصل بي أحد من خلال الإيميل الخاص بي ولا توجد عروض لى بالاستعانة بشهرتي على المواقع الإلكترونية ونشر عدة مقاطع فيديو على حساباتي المختلفة أو بدعوة الفتيات بالامتثال بي والرقص مثلي ونشرها للدخول على تطبيق لايكي".

وأنكرت مودة الأدهم فى التحقيقات علاقتها بمقطع فيديو عرضته عليها جهات التحقيق يكشف عن ظهور فتاة ورجل يمارسان علاقة جنسية داخل دورة مياه، مضيفة أن المقطع ليس لها، وقالت: "البنت ظاهرة فيه اللي هو مش أنا خالص، ودا المقطع اللي مقدمه الضابط بس مش كامل ولكن أنا قدمته كامل".

وواجهت النيابة المتهمة بمقطع فيديو آخر من خلال الفلاشة المقدمة، والذي مدته 32 ثانية والذي تظهر فيه المتهمة قائلة: "رسالة إلى كل السناجل" ثم طلبت من طفلة الحضور قائلة: "قوليلي يا ساندي انتي مرتبطة؟" فأجابتها الطفلة: "آه" فسألتها المتهمة: "إنتي عندك كام سنة؟" فأجابتها الطفلة: "13 سنة" فقالت مودة الأدهم: عندها 13 سنة يا جماعة ومرتبطة حد عايز يقول حاجة أنا عن نفسي نوكومينت مش هتكلم الأندر إيدج إيه نظامهم، الأندر إيدج ارتبطوا خلاص إيه بقى انتوا نظامكوا عشان أنا الحمد لله"، وأجابت بأن "تلك البنت هى جارتها وصديقة والدتها، وأنها لم تنشره فى أى حتة".

وأضافت المتهمة: "باعتباري شخصا مؤثرا على السوشيال ميديا فبيجيلي سبونسرز زي دكاترة أو لاعيبة كورة مذيعين عايزين يكبروا الأكونت الخاص بيهم وعدد المتابعين فهما بيلموا من بعضهم ويجيبو هدايا وباخدها منهم وأنا بطلع على الاستوري عندي وأقول للمتابعين بتوعي باعتبار إنهم كتير اللي عايز يشترك فيها شروطها إنهم يدخلوا يعملوا متابعة للأكونتات بتاعة الاسبونسرز اللي جابوا الهدايا عشان المتابعين بتوعهم يزيدوا وبعد أيام هعلن مين اللي هيكسب الهدايا دي، وفعلًا بعديها بثلاثة أيام بختار عشوائي من المتابعين في الأكونت بتاعي واحد أو أكثر منهم وده اللي بتفق معاه وبروح أوديله الجائزة اللي المفروض الاسبونسرز اللي جايبينها، وسبب اختياري عشان أنا عندي متابعين كتير على الإنستجرام".

وأوضحت مودة الأدهم: "الذي يطلبه مني سالفو الذكر تحديدًا هما عايزين المتابعين بتوعهم يزيدوا عن طريق تقديم هدايا عن طريقي أنا، وهو بيبقى عددهم من عشرين لحد خمسين، وأسماء هؤلاء كتير قوي أنا كل شهر بعمل مسابقة فمش هفتكر أساميهم إيه بس فيه واحدة اسمها ميرنا هي اللي بتجبلي الهدايا والجوائز اللي باخدها منها وهي من المنصورة معرفش غير كده، واللى عرفني عليها دكتور على وده من مشاهير السوشيال ميديا".

وواجهت النيابة مودة الأدهم بـ 8 مقاطع فيديو على حسابها بـ تيك توك والذي تظهر فيه مع أطفال، وأكدت أن الأطفال جيرانها وبيحبوا يتصوروا معاها.

وحول الصور المخلة المنشورة لها على مواقع التواصل الاجتماعى، قالت إنه فى عام 2015 تمت سرقة هاتفها المحمول من منزلها بمرسى مطروح وقام خالها بإعادته لها وتمت سرقة الصور وإرسالها على أرقام الهواتف، وأنها لم تحرر محضرا بالواقعة لكونها مشغولة بالخطوبة ولم تتخذ أى إجراءات قانونية فى الواقعة، وأن "الصور المنشورة كانت على الهاتف وصورتها لنفسي سيلفي وكل الصور فى غرفتى فى منزلى الخاص، وأنا كنت دخلت ميس إيجيبت 2016 والبنات كانت منفسنة منى وهما الي طلعوها بلينك ودينا سرقت منى الموبايل 2015 وبعتت كل الصور لكل الأرقام المسجلة عندى على الواتس اب وهما حوالى 25 واحد".

وأثبتت المحكمة طلبات الدفاع، حيث طلب دفاع المتهمة مودة الأدهم التصريح له باستخراج محاضر مباحث التكنولوجيا والمعلومات المحررة بتاريخ 19 مايو 2019 الخاصة بسرقة هاتفها المحمول والتي تضمن تهديدها وابتزازها بالصور الخاصة بها الموجودة عليه، كما إخلاء سبيل مودة الأدهم بأي ضمان تراه المحكمة لحين تنفيذ تصريح المحكمة له سالف الذكر وتقديم المستندات والاستعداد للمرافعة النهائية، كما طالب دفاع الطالبة حنين حسام وباقي المتهمين الاطلاع على أوراق القضية.

وكانت الدائرة الثالثة جنح بالمحكمة الاقتصادية، نظرت أولى جلسات محاكمة حنين حسام، ومودة الأدهم، و3 آخرين، في اتهامهم بالتعدي على القيم والمبادىء الأسرية، ونشر الفسق والفجور، في القضية المعروفة إعلاميًا بـ "فتيات التيك توك" لجلسة 29 يونيو الجاري.