إلى الدولة .. كفاية حنيه.. الحظر التام
الأحد 05/أبريل/2020 - 08:10 ص
الدولة فى إجراءاتها الوقائية ل مكافحة كورونا فعلت المستحيل من أجل إرضاء الأغلبية .
دى حقيقة يجب أن نعترف بها. الدولة وقفت مع الجميع لكن هل وقف الجميع مع الدولة . سؤال بيطرح نفسه. أقل شىء هو التزام الصمت حاليا وليس الخروج بتصريحات مستفزة من أغنياء رجال الأعمال اللى خائفين على أعمالهم ولا هم محسوبين على الأنظمة السابقه اللى علمتهم الدلع. (مش سياسة )
الدولة لازم تاخد قرارات جريئة واللى مش عاجبة يسكت. الدولة مجبره على مواجهة مباشره وبلاش الحنية والطبطبة والأدب الزائد عن الحد لأنه بيتفهم غلط. الدوله فى مواجهة مع
1- ناس مستهتره وتحذرها تفقع مرارتك " يا عم قول يا رب".
2- ناس متستره فى رداء الدين وهم ليسوا أهل ذلك بل يسترزقون من أصحاب المصالح و المتاجرين بالدين.
3- صغار رجال الأعمال تبرعوا بينما الحيتان الكبيره لم نسمع منهم سوى خوفهم على إفلاس البلد بسبب توقف العمل. العالم كله واقف وتعطل ودليل ذلك أسعار البترول المتدنية.
4- الصحه والشرطة يعملو ايه وحدهم أمام التكدسات و عدم احتراس الناس والإهمال و اللامبالاة.ألله يعينهم.
5- كمان عبده مشتاق اللى كل م الأعداد المصابة تزيد يولع الدنيا إشاعات و...... الخ.
ايه المطلوب فورا
1- حظر كامل 24ساعه ولمدة 5ايام لمنع تفاقم الإعداد المصابة. لحظتها ح نركز اكتر.
ح تقولى الفاكهة و الخضار اقولك خليهم فى عربات بيع متنقلة تجوب الشوارع و كذلك الخبز.
اللحوم و الدواجن بلاش منها أسبوع علشان التجار ينزلو الأسعار.
2- وقف جميع الأعمال الحكومية والخاصة لمدة أسبوع.
3 - الإبقاء على حالات الحظر الجزئي فى المحافظات الأقل من 20 حالة.أما المحافظات الأقل من 5 حالات فيجب وقف إجراءات الحظر فورا.
4- وقف التنقل بين مراكز المحافظة الواحدة وبين المحافظات وبعض لوقف تنقل المرض.
