مرمطة اولياء الأمور فى التربية والتعليم .!!
الأحد 20/أكتوبر/2019 - 06:23 م
المفروض مكينة الخدمات هدفها التيسير على المواطنين وتحقيق الشفافية والعدالة بس فى وزارة التعليم بقى ليها هدف عكسى هو التفنن فى مرمطة الناس وبهدلتهم ودا اللى عشته بنفسى انهاردة وواضح انى هعيش معاه الكام يوم الجايين لمجرد انى قررت خوض تجربة إلحاق ابنائى بالمدارس التجريبية .
الحكاية الأولى بدأت لما صدقت أنى مش محتاج واسطة علشان الحق ابنتى بمرحلة رياض الاطفال المدارس التجريبية لأن سنها اول أكتوبر ٥سنوات و٨ اشهر و١١ يوم يعنى داخلة داخلة .
علشان كدا ماكنتش قلقان من تأخير اعلان نتيجة المرحلة الثانية لتنسيق تجريبيات الجيزة إللى بالمناسبة ظهر يوم الخميس يعنى بعد اكثر من شهر على بداية العام الدراسى .
فعلا التنسيق ظهر وإدارة العمرانية إللى مقدم عليها اخدت اقل من سن ابنتى بمايقرب من شهر يعنى المفروض انه هيتحقق رغبتى الأولى بس المفاجأة أن الاسم مانزلش خالص ومش لواحدها دا لناس كثير كانوا معايا فى رحلة عذاب التظلم إللى شفنا فيه الأمرين واللى انتهى بفوتوا علينا كمان عشرين يوم يكون فيه تنسيق جديد طيب ياناس ياهو ماهو التنسيق الجديد معناه انكم ترشحونا لمدرسة ابعد وإدارة تانية لكن لاحياة لمن تنادى وطبعا نفسنا نعرف لمصلحة اولاد مين نزل السن فى التنسيق فى ادارة العمرانية وسقط كل هؤلاء سهوا من الترشيح
الحكاية التانية .
من السنة إللى فاتت ومع تطبيق الشمول المالى حصلت حاجة عجيبة وبقى ولى الامر مطالب يدفع جزء قيمته اقل من ٢٠٠ جنيه من المصروفات فى البوسطة ويدفع باقى المصروفات فى المدرسة ورغم أن دا مش مفهوم ومايحققش هدف الشمول المالى.
والجزء إللى بيدفع فى المدرسة بيدفع بالبقشيش والحبشتكانات وخلافه الا اننا ماقدمناش حاجة غير المشورة واخذ اجازة يوم من العمل علشان حوالة مكتب البريد وماادراك ما معنى السداد بمكتب البريد يعنى طوابير بتضم طلبة المدارس وبتوع حوالات التموين والتعيينات والمعاشات .
وخلافه يعنى مش اقل من ساعتين طابور ودا المعاد إللى وقفته تقريبا لغاية ما جه الدور لتفاجأنى الموظفةاللى مش طايقة نفسها من الحر الاسم مش متسجل يعنى ايه يعنى ارجع المدرسة سجله الكترونى هناك وبعدين تعالى ادفع ..رحت اسجل المديرة قالتلى هات شهادة ميلاد طبعا طلب مش مفهوم لأن المفروض وانا بقدم من شهر مديهم شهادة ميلاد وصور وكل حاجة طبعا بس تقول ايه دوخينى يالمونة .
