عاجل وبالمستندات| 215 جنيها استحقاق المعلمين من التسوية الضريبية عن مكافآت الامتحانات
السبت 30/يونيو/2018 - 01:14 م
نشر محمد اسماعيل منصور احد نشطاء التعليم على صفحة أعرف حقك بموقع التواصل الاجتماعى "فيسبوك" استحقاق المعلمين لمبلغ 215 جنيها من مصلحة الضرائب نتيجة للخصومات من مكافأة الامتحانات خلال العام الماضى، حيث رصد فى كشف تسوية ضريبية عن اجمالى الدخل السنوى لمعلم خبير.
وقال الناشط التعليمى التالى:
"صدر تعديل ضريبي العام الماضي بموجب قانون 82 لسنة 2017 ؛ كان المفروض التعديل دوت يطبق علي مكافأة الامتحانات الخاصة بالعام الماضي بس ما لحقناش نطبقه بسبب ان القانون نشر ولم يعمل به لحين نشر اللائحة طبقا لما ورد بالقانون وتم خصم 10% من المكافاة في حين ان المفروض اللي اتخصم 4% فقط .
طب ايه مصير ال 6% اللى اتخصموا بالزيادة ؟
كان المفروض يتم وقف الخصم من اغسطس 2017 بس للاسف دا ما حصلش في بعض الجهات والبعض التزم زى مثلا إدارة المنشأة بسوهاج ومدرسة في محافظة تانية بلاش نقول عليها ، وغالب الادارات خفضت الخصم من 10% الى 2% واكتفت بكدا بحجه ان الضريبه قلت والمدرسيين يحمدوا ربنا واللى اتخصم بالزياده هما ما يعرفهوش اصلا .
طب ايه الحل ف الموضوع واقدر اخد اللى اتخصم ولا لاء خاصه ان نفس الموضوع هيتكرر مع التعديل التانى اللى حصل السنه دى بموجب قانون 97 لسنة 2018 ؟
الحل : طلب تسوية ضريبية زى دى 👇 مكتوب فيها اللى اتخصم منى على مدار عام 2017 ؛ ولو حضرتك ركزت على السطر الاخير ف التسوية هتلاقي ان الحاله اللى في المثال لها فلوس عند الضرايب علما بانه ما بيدفعش ضرايب من اغسطس لحد اخر السنه فما بالك انت لك كام وانت بيتخصم منك طول السنه ؟!
طب محرر الماهيات رفض يديك تسوية ؟
من حق حضرتك تلجأ للنيابة الادارية لانه بكدا خالف المادة 15 من قانون رقم 91 لسنه 2005 والنيابة هتجيب حقك .
طب لما اجيب التسوية ويطلع ليه فلوس عن العام الماضي وبالتالي هيكون ليه فلوس برده عن هذا العام هاخدهم ؟
اه هتاخدهم اما نقدا او عن طريق مقاصة ( اى وقف خصم الضرايب من المرتب والضرايب تخصم من الفلوس اللى عندها )
وختاما : هنشرح النقط دى بالتفصيل مع ارفاق صورة من كل مادة ذكرت".
