بالمستندات.. ولية أمر لـ"شوقي" : "بقالي سنتين متمرمطة ومحتاجة أعرف اتصرف أزاي"

وإليكم نص الرسالة:-

من فضلكم عندي مشكلة ومش عارفة الاقي حل ومحتاجاكم تساعدوني على نشرها كتير .

من سنتين قدمت لابني في مدرسة تجريبيه كانت جمب بيت حماتي لإني كنت ساكنه معاها في الحلمية الجديدة و بعدين جالي تعيين وظيفي في الهرم انا بشتغل مدرسة و طبعا مينفعش اعمل نقل فكان القرار اني لازم اعزل و اخد شقة ايجار في فيصل عشان المشوار صعب جدا كل يوم وانا عندي طفلين وحماتي مريضة متقدرش على رعايتهم .

فأول سنة لابني في كي جي معرفتش اوديه المدرسة و فضلت احاول انقله و اخدت موافقة من محافظ الجيزه والورق موثق و مختوم و روحت الادارة التعليمية ورفضوا عشان قالولي المحافظ رفض النقل مع اني معايا الموافقة .

و بدأت السنة ديه و اضطريت اقعد شوية عند حماتي و شوية في بيتي و بروح شغلي كل يوم ب 3 و 4 مواصلات و باخد في الطريق ساعتين واكتر غير تأخيري عالولاد .

و السنة ديه تاني اخدت موافقة تاني بلم شمل الاسرة عشان يكوني ابني في مدرسة قريبة من شغلي في الهرم الموافقة اخذتها عن طريق نائب وزير التربية والتعليم و المفروض تتنفذ و في ادارة العمرانية التعليمية اترفضت تاني للسنة التانيه عالتوالي و السبب ان المحافظ مانع اي نقل وانا مش فاهمة ليه ولا اعمل ايه ومش عارفة اخد حق ولا باطل مع حد .

هو نقل طفل من مدرسة بعيدة عن بيته ومن محافظة لمحافظة تانية لظروف السكن ده معجزة ! بقالي سنتين متمرمطة و ابني هيبدأ في اول ابتدائي السنة الجاية ولازم يكون في استقرار عشان الطفل و تركيزه و متابعته و تأسيسه هو ده صعب أوي كده ؟.

انا محتاجة اعرف اعمل ايه واتصرف ازاي من فضلكم ساعدوني انشر مشكلتي على الجروبات الخاصة بوزارة التربية والتعليم .