كيف تقوم بتأمين حسابك علي "الفيس بوك " بطريقة سهلة

انتشر في الاونه الاخيره سرقه حسابات الفيسبوك و استغلالها و ابتزاز اصحابها او التجسس عليها , طيب ازاي اقدر امن حسابي بحيث مهما حصل مستحيل ان اي هاكر يعرف يخترق حسابي حتي لو اخترق الجهاز بتاعي ؟

* اغير الميل بتاعي الي Gmail و الغي الميلات القديمه و ده لان اختراق الميلات الهوتميل سهله اوي خصوصا للناس اللي مش بتفتح الهوتميل بتاعها فترات طويله و الياهو مخترق اصلا لوحده فلازم امسح الميل القديم و اربط الحساب بجي ميل و ما اعتمدش علي رقم الموبايلات يعني لازم ميل يكون مربوط بالحساب مش رقم بس .

* مهم اوي ان كلمه السر بتاعتي تكون طويله و فيها حروف و ارقام و حروف كابيتال و حروف صغيره و ممنوع منعا باتا استخدام نفس كلمه السر في الفيسبوك و الميل و اي تطبيق تاني يعني ببساطه اعمل كلمه سر مختلفه لكل حاجه و تكون كلمه سر قويه مش سهل تخمينها

* اربط الحساب بتاعي برقم الموبايل و اشغل خاصيه الاكواد بمعني ان اي متصفح جديد يتفتح منه الحساب الفيسبوك بيبعتلي رساله علي موبايلي فيها ارقام لازم ادخلهم علشان الحساب يتفتح و ده مفيد جدا و بيمنع سرقه الحساب خالص حتي لو الهاكر عرف الباسوورد بتاعتي او حتي بعتلي لينك اختراق اخترق جهاز اللابتوب او الموبايل لانه ببساطه برضه مش حيعرف يدخل حساب الفيسبوك و بكده اكون انا الوحيد اللي معايا موبايلي و اقدر افتح حساب الفيسبوك .

* ضروري اني يكون اسم الحساب بتاعي اسمي الحقيقي لان الفيسبوك بيقفل الحسابات الوهميه فلو الاكاونت باسمي الحقيقي مش حيتقفل و لو اتقفل حيطلب مني صوره من بطاقتي الشخصيه اصورها بالموبايل و ابعتهالهم يفتحوا الحساب و كمان يوثقوه بحيث انه ما يتقفلش تاني خالص .

* اضافه 5 اصدقاء موثوقين و ده بيحصل من الاعدادات برضه بختار من 3 الي 5 اصدقاء اثق فيهم بحيث لو اتقفل الحساب لاي سبب من الاسباب برجعلهم الفيسبوك بيبعتلهم ارقام يكلموك بالموبايل يديوهولك فيرجع الحساب يشتغل تاني و دي خطوه برضه مهمه .

* ما تنساش تحط شريط لاصق اسود علي الكاميرا بتاعه اللابتوب لان اي حد حتي و لو محترف بسهوله ممكن الهاكرز يتجسسوا عليه و من الافضل اني دايما اتعامل مع المايك و الكاميرا انهم دايما مفتوحين و ما احطوش في غرفه نومي او في اماكن خاصه .

* ممنوع منعا باتا ضغط اي لينك يتبعتلي من اي شخص حتي لو اعرفه و الافضل ادور انا علي اللينكات اللي انا عاوزها حتي لو لينك خبر من موقع اخباري او حتي يوتيوب لان الهاكرز بيعملوا خدع كتير علشان يخترقوني .

* بلاش احط اي مستندات مهمه او صور خاصه علي اللابتوب و طبعا ممنوع منعا باتا علي الموبايلات اسيب صوري او اتصور صور خارجه او ما شابه و بلاش ابيع الموبايل لاي شخص لانه ممكن يسترجع صوري و يبتزني بيهم .

* بلاش تنشر اي صور او فيديوهات فيها عنف او قتل او باسبورات او بطايق او فيها حاجات خارجه او ارفع فيديوهات من مواقع يوتيوب خاصه بقنوات فضائيه او اغاني علشان ريبورت واحد ممكن يطير حسابي خالص .

* اي خطوه مش عارف تعملها ادخل علي يوتيوب و اكتب كيفيه عملها حتلاقي فيديوهات كتير بالعربي و الانجليزي تشرحلك اللي انت عاوز تعرفه بس انت اتعود تبحث و تتعب علشان تتعلم و ما تستسهلش و تدور علي حد يشرحلك كله موجود و حيعلمك كويس بشرح ممتاز .

* ضروري يا معلم تكون كاتب ورقه فيها الباسووردات بتاعه الجيميل و الفيسبوك لان لو حسابك اتسرق حنعرف نرجعهولك بشرط انك تكون فاكر كلمه السر بتاعه الميل و الفيسبوك و ما تكونش ناسيهم .

* ادخل مركز المساعده بتاعه الفيسبوك فيها شرح بالفيديوهات و بيشرحلك كل حاجه بالتفصيل و كمان تقدر تسال اي سؤال هو حيجاوبك .

* التكنولوجيا عامله زي السلاح لو انت جاهل بيها حتضرك و تقتلك فلازم تتعلمها قبل ما تستخدمها ساعتها حتفيدك و تسليك و تنفعك .

لو عملت الكام حاجه اللي مكتوبين دول سرقه حسابك او غلقه حيكون صعب لدرجه المستحيل علي اي هاكر انه يخترقك بس ما تحطش برضه بطيخه صيفي اوي في بطنك لان فيه اجهزه امنيه عندها برامج اختراق و تجسس مدفوع فيها ملايين يقدروا برضه انهم يخترقوك و يتجسسوا عليك ;)

شير علشان الناس تأمن حساباتها